Uumassusilerineq

SILA uumassusililerinermi bachelorinngorniarfik; ilinniartitaaneq allaanerusoq kalaallinut ilinniartunut nunatsinnilu inuussutissarsiornermut immikkut sammititaq.

“Ilinniarnerup nalaani aavartassaagut, puisit aqajarormiuinik misissuisassaagut nunatsinnilu suliffeqarfinnut pulaartarluta - pinngortitami laboratoriamilu uumassusilinnik misissuinermik misilittagaqalerneq ilutigalugu, ilinniartoq uumassusillit pillugit ilisimasaqalissaaq tamatuminngalu ingerlatitseqqiinissaq ilikkarlugu” – Ilisimatusarfik

Nunatsinni pinngortitaq/avatangiisit uumassusillit immikkut atassuteqarfigaagut. Ilisimatusarfimmi Pinngortitaleriffimmilu ataatsimoorluta- uumassusilerinermi bachelorinngorniarneq; nunatsinnit, nunatsinni pinngortitamit nunatsinnilu kulturitsinnik aallaaveqartoq pilersipparput. Ilinniartitaanermi ilinniartuuneq toqqissinartoq kajungernartorlu qitiuvoq.

SILA tassaavoq pinngortitaq, kinguaariit tulliuttut uumassusillit assigiinngiiaartorpassuunerannik, silap pissusaata allanngoriartorneranik, inuit pinngortitallu akornanni ataqatigiinnermik, nunatsinni issittumilu immikkuullarissuusumi periarfissanik piusunik ataqqinnittumik atuinissaq toqqammavigalugu ilinniartitaaneq. Ilinniartitaaneq nunatsinni inuussutissarsiornermut immikkut sammitinneqarpoq, ilinniartullu piginnaasaannik aalajangersimasunik, nunatsinni uumassusilerisutut sulinerminni atorsinnaasaannik qulakkeerisussaalluni.

1. Pinngortitami pisuussutinik uumassusilinnik aqutsineq. Avatangiisinut inuiaqatigiinnullu, piujuaannartitsinissaq aallaavigalugu SILA qulequtsiullugu uumassusilerinermi bachelor, pinngortitami pisuussutinik aqutsinermut atatillugu allaffissornikkut ingerlatsinermi peqataasinnaavoq. Ilinniartoq inatsisit suleriaatsillu atuuttut pillugit aalajangersimasunik ilisimasaqalissaaq ingerlatsivimmilu ilisimasanik assigiinngitsunik ataatsimoortitsisinnaassalluni. Ilinniartup ingerlatsivimmi susassaqaqatit- ilaatigut allaffissornikkut ingerlatsivik, politikkikkut ingerlatsineq, aalisartut, piniartut ilisimatusartullu tamaasa misilittagaqarfigilissavai.
2. Silap pissusaata allanngoriartornera. Ilinniartup issittumi silap pissusaata maanna allanngornera tamatumalu avatangiisinik ileraginninnermut, inuiaqatigiinnut aningaasaqarnermullu sunniutai annertuumik ilisimasaqarfigilissavai. Iliniartup nunani tamalaani nunalu tamakkerlugu suliniutit, nalunaarusiat suliniaqatigiiffiillu silap pissusaata allanngorneranik sammisaqartut naapertuuttut, ilisimaarilissavai. Ilinniartoq silap pissusaa pillugu paasissutissanik, silap pissusaa pillugu ilisimatusarnernik, periutsinik atortunillu- ilisimasanik tunngavilinnik- misissueqqissaarsinnaalissaaq.
3. Peqqinneq pinngortitarlu. Nunatsinni inuit pinngortitallu imminnut ataqatigiinnerannik, tamatumunngalu atatillugu nerisarisartakkanut, nunalerinermut, piniarnermut aalisarnermullu, pinngortitap peqqissutsimut sunniutaanut, aningaasarsiorfiusinnaaneranut kulturimullu pingaaruteqarneranik, ilinniartoq paasinnissaaq.

 

2024-imi ukiakkut ilinnialernissamut qinnuteqartoqarsinnaanngussaaq; qinnuteqarfissaq kingulleq 1. november 2024.
Ilinniarnerup aaqqissuussaanerani ilinnialersinnaanermut piumasaqaatitut siunnersuutaasut, qinnuteqaammik tunngavilersukkamik piumasaqaatillu pingasut uku arlaannik ataatsimik tunngaveqassapput:

1. Qinnuteqaat tunngavilersugaq kiisalu ilinniarnertuunngorniarfimmi ilinnialissutaasinnaasumik soraarummeersimaneq, minnerpaamik tulleriinnilersuineq GGS/alloriarnerit arfineq marluk atorlugit karakteerilersueriaatsimi agguaqatigiissitsinermi 5 anguneqarsimassaaq, imal. tulleriinnilersuinermi allami fagini ukunani taamaaqataanik angusaqartoqarsimassalluni:
   • Kalaallit imal. danskit oqaasii killiffik A
   • Tuluit oqaasii killiffik B
   • Matematik imal. fagit pinngortitamik ilisimatusarnermut tunngasut killiffik A-mik angusisimaneq
2. Piumasaqaatit allat tunngavigalugit ilinniartussatut tiguneqarneq, ass. ilinniarnertuunngorniarfimmi agguaqatigiissitsinermi angusaq appasinnerusoq, qinnuteqaat tunngavilersugaq, misilittagaq alla immaqalu immikkut oqaloqatigineqarneq.
3. Qinnuteqaat tunngavilersugaq kiisalu ilinniarnertuunngorniarfimmit ilinnialissutaasinnaasumik soraarummeerneq, GGS/alloriarnerit arfineq marluk atorlugit karakteerilersueriaatsimi karakteerilersueriaatsimiluunniit allami taamaaqataani agguaqatigiissitsinermi, 10 qaangerlugu angusiffiusimappat.

Ilinnialersinnaasunik piginnaanilinnik amerlanernik qinnuteqartoqarpat, qinnuteqaat tunngavilersugaq pingaartinneqassaaq immikkullu oqaloqatigiinnissamut aggersaasoqarsinnaassalluni.

Tunngavilersukkamik qinnuteqaat annerpaamik quppernermik ataatsimik takissuseqassaaq kalaallisullu, qallunaatut imaluunniit tuluttut allanneqarsinnaalluni. Tunngavilersukkamik qinnuteqaammi ukua pingaartumik tusarusuppagut:

• Kinaavit - arlaannik pingaartitannik oqaluttuutsigut.
• SILA-mi uumassusilerinermi bachelorinngorniarnissamut sooq qinnuteqarpit?
• Siunissami suna suliarissallugu takorloorpiuk?

 

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit:

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit:

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatit Ilisimatusarfimmit suliarineqassaaq, ilinniagaqarnersiuteqarnissamut qinnuteqaatit Ilinniagaqarnersiuteqartitsivimmit suliarineqassalluni, kisianni taakku tamarmik Ilisimatusarfimmit allaffissornikkut aqunneqassapput.

Nalunaarfigineqassaatit akuerisaasimanerlutit imaluunniit akuerisaasimannginnerlutit.

Eqqaamallugu ilumut ilinnialerniarlutit nalunaarutigissagakku.

Qinnuteqarnerpit nalaani suli soraarummeersimanngikkuit akuerineqarsinnaavutit soraarummeerninni angusisimanissat piumasaqaatiginerqarluni.
Eqqaamallugu soraarummeersimanermut uppernarsaat nassiunneqassammat kingusinnerpaamik juunip 29-ani.

Ilinniarnerup qaqugu aallartinnissaa, ilinniagaqarnersiutit il.il. pillugit kigusinnerpaamik 15 januaari Iliisimatusarfimmit ilisimatinneqassaatit.

Ilinniarnermik aallartiffik
Ilinniagaq ingerlaavartumik 1 februaarip

Neqeroortoq
Ilimmarfik

Aningaasaqarneq
Sullissivik aqqutigalugu ilinniarnersianik ilinniarninni qinnuteqarsinnavutit

Suliffimmik misiliinermi pissutsit
Suliffimmik misiliissanngilatit

Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 6 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit .Ingerlaqqiffiusumik inersimasunik ilinniartitaanermi piginaasat qaffasissusaat

Siunissami periarfissat/ Suliffiusinnaasut
SILA uumassusililerinermi bachelorinngorniarfimmi piginnaasatigut qaffakkiartorfissat assigiinngitsut qinnuteqarfiusinnaassapput:

• Allaffissorneq/ingerlatsineq
• Suliffissuaqarneq
• Suliniummik ataqatigiissaarineq
• Isumassarsianik piviusunngortitsiniarneq
• Siunnersortaaneq ass. ilisimatusarnermi siunnersortaaneq
• Avatangiisileraluni takornarialerineq
• Piniarneq aalisarnerlu
• Suliniaqatigiiffiit pisortanut attuumassuteqanngitsut (aningaasatigut iluanaarniarfiunngitsut)
• Kandidatinngornikkut ph.d-nngorniuteqarnikkullu qaffasinnerusumut ingerlaqqinneq
  
  

Ilinniarnermik aaqqissuussineq

Isumaqaruit Ilisimatusarfiup akuerineqarnissannik aalajangiinera maleruagassanik unioqqutitsisinerusoq maalaarsinnaavutit.

Maalaarut allaganngorlugu nassiutissavat ilinniartunik kiffartuussivimmut: studieadm@uni.gl

Maalaarut tunngavilersussavat tunniutissallugulu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.