Timmisartortartoq

Timmisartortartutut ilinniarnermi pilersaarusiorneq aamma timmisartumik aallartinnermiit minnissamut qanoq isumannaatsumik aqunnissaq ilinniassavatit.

Inuussutissarsiutigalugu timmisartortartutut sulerusuppit aamma timmisartuussisarnissat timmisartunillu attartorluni timmisartuussisarnissat aaqqissuuttarusuppigit naammassillugillu? Taamaappat Inuussutissarsiutigalugu timmisartortartunngorniarfimmut qinnuteqarsinnaavutit (timmisartoq suluusalik). Ilinniagaq ukiut marluk missaannik sivisussuseqarpoq Roskildemilu ingerlanneqartarluni kiisalu atuagarsornermik suliffimmillu misiliinermik (timmisartornermik) imaqarluni. Immikkoortunut agguagaavoq, taakku tamarmik uppernarsaatinik assigiinngitsunik pissarsisarnermik naggaserneqartassapput, taakkulu ilaatigut tassaapput inuussutissarsiutigalugu timmisartuussisinnaanermut uppernarsaat, MCC-mut uppernarsaat kiisalu Dash 8-mut Type Rating.
Kalaallit Nunaanni Namminersorlutik Oqartussat timmisartunngorniartunut amerlanerpaamik arfinilinnut immikkut tapiissuteqartarput. Ilinniartunik akuersisarneq sapinngisamik arnanik angutinillu amerlaqatigiinnik ilinnialernissamut akuerinnittoqartarnissaa.


Timmisartortartup ulluinnarni makku suliarisarpai:

• Timmisartunik attartorluni timmisartuussinernik aaqqissuussineq ingerlatsinerlu.

• Timmisartut tamakkiisumik timmisinnaanersut misissortarneri, taakkununnga timmisartuussinermut ataatsimut ikummatissat naammannersut naatsorsuisarneq, silassamik mittarfiillu pillugit nalunaarutit misissuisarneq il.il. aamma timmisartup oqimaassusaanik oqimaaqatigiissarneranillu qulakkeerinninneq.

• Sapinngisamik isumannaannerpaamik timmisartuussinermik naammassisaqarneq. Timmisartortartut ulloq unnuarlu sulisarnissartik naatsorsuutigissavaat.

Timmisartunngorniarfik pillugu uani paasisaqarnerusinnaavutit:

Timmiartortartunngorniatut tigusaassaguit piumasaqaatit makku naammassisimassavatit:

• ilinniarnertuunngorniarfimmi misilitsinnermi tuluttut B aamma matematik B minnerpaamik 7 imal. tuluttut A aamma matematik A minnerpaamik karakteeri agguaqatigiissillugu 4 faagini tamani (misilitsinnermi angusat)

imaluunniit

• HF-imi faagini ataasiakkaani tuluttut B-mi matematikkimilu B-mi agguaqatigiissillugu minnerpaamik karakteeri 7 imal. tuluttut A aamma matematik A faagini tamani minnerpaamik agguaqatigiissillugu 4 karakteri (misilitsinnermi angusat).

Agguaqatigiissillugu angusat naatsorsornerini misilitsinnermi angusat kisimik ilanngunneqassapput ukiumut angusaajunnartut ilanngunnagit. Ilinniakkap aallartinneqarnerani qinnuteqartoq amerlanerpaamik 35-nik ukioqassaaq.

• Namminersorlutik Oqartussat ilinniagaqarnersiutit pillugit piumasaqaataannik eqquutsitsinissat – Ingerlaqqiffiusumik ilinniakkat immikkut piumasaqaatitallit pillugit paasisaqarnerugit
• Onlinekkut qinnuteqaat aqqutigalugu Misissugassat immersussagitit.
• Atorfimmut inuttassarsiuussineq

Air Greenland A/S-imit aamma immikkut piumasaqaatit
Ilinniartitaaneq allaffissornikkut Air Greenland A/S-imit aqunneqassaaq, Namminersorlutik Oqartussat inassutigisaasa akornanni toqqaasartuusussamit – pisariaqartunik piginnaaneqarnissaq eqqarsaatigalugu, kiisalu ilinniareernerup kingorna suliffissaqarsinnaaneq tunngavigalugu, - inuit:

• teorimik atuarnermi piumasaqaataasumik misilitsinnermi angusisimanissaq
• Air Greenland A/S-ip tarnip pissusaanik tarnikkullu qisuariartaatinik misilitsitsinernik angusisimanissaq,
• inuussutissarsiutigalugu timmisartortartutut allagartartaarnissamut instrumentinillu atuisinnaanermut allagartartaarnissamut atorneqartussamik atuarsinnaanermik misilitsinnerup naammassisimanissaa
• ingerlatseqatigiiffiit timmisartuini flight control-ii immikkut aalajangersaanngikkaluarluni passussinnaallugit timmisartortartutullu naleqquttutut nalilerneqarsimanissaq.

Qulaani toortagaq sungaartoq toorlugu ilinniakkamut qinnuteqarsinnaavutit. Taassuma kingorna pilotinngorniarneq toqqassavata qinnuteqaativillu suliaralugu naammassinera toqqarlugit, taakkualu kingorna maileq uunga nassiutissavat:hrudvikling@airgreenland.gl allattorsimaffik immersorsimasat kakkiullugu aamma najukkavit uppernarsaataa, ilinniarsimanermut uppernarsaat pineqaatissinneqarsimannginnermullu uppernarsaat ilanngussanngorlugit ilanngullugit. Taakkua suliarereerukkit ingerlaannaq Kalaallit Illuinut ilinniagaqarnersiuteqarnissaq qinnutigissavat. Tamanna immikkoortumi tullermi nassuiarneqarpoq.

Tamatuma saniatigut qinnuteqarnerup kingorna immikkut ittunik misilitsittoqassaaq.

Misilitsinneq
Aallartinnginnermi misiliutit arlallit ingerlanneqarlutillu angusiffiusimassapput. Misilitsinnerit siunertaraat qinnuteqartoq ilinniakkaminik naammassinnissinnaanersoq kiisalu inuussutissarsiutigalugu timmisartortartuusinnaanersoq nalilersussallugu.
Misilitsinnerit makku ilaapput.

Oqaloqatigiinnerit aallarnisaataasut:

Silassorissutsimik misilitsinneq:
Tassani qinnuteqartup ajornartorsiutinik iluarsiisinnaanera nutaanillu ilisimasaqalersinnaanera nalilersorneqartarput. Piginnaasat ilaatigut timmisartortartup atorfianut ilaatigullu ilinniarnerup nalaani, annertuumik ilikkagassatut atuagarsorfiusussami pingaarutillit.

Ilisimasanik misilitsinneq
Tassani qinnuteqartup tuluttut matematikimilu piginnaasai nalilerneqartarput. Tuluttut pikkorissuusariaqarpoq, tassami ilinniarneq tuluttut ingerlanneqartarami. Matematikimik ilisimasaqarluarnissaq fagini arlalinni pisariaqartinneqarpoq, ass. sumiissusersiornermi, flyteknik datalæremilu.

Teknisk-mekaniskimik misilitsinneq
Tassani misilitsinnermi teknikikkut-mekaniskikkut eqqarsarsinnaaneq nalilersorneqartarpoq.

Timmisartut tarraattut isikkullit suussusersiniarnerinik misilitsinneq
Misilitsinnermi tassani timmisartup inissisimaffimminik nikerartarnerani qanoq allanngortarnera pillugu takorluuisinnaaneq nalilersorneqartarpoq - tassa aalanerit 3D-mik paasinnissinnaaneq tassani pineqarluni.

Piginnaasanik misiliineq:
Misilitsinnermi tassani qinnuteqartoq sulianik arlalinnik suliaqarsinnaanersoq nalilersorneqartarpoq, ass. assani atuutigalugit qaratsaminik suliaqarsinnaanersoq nalilersorneqartarluni.

Apersuineq
Toqqaaniarneq apersuinikkut aallartinneqartarpoq, taanna Air Greenlandimit ingerlanneqassaaq.
Misilitsikkiartorluni oqaloqatiginnikkiartorlunilu angalanernut aningaasartuutit Air Greenlandimit akilerneqartassapput. Taakku saniatigut Air Greenlandip ilinniarnermut immikkoortortaa timmisartortartunngorniartut timmisartuutileqatigiinni akuersissuteqartuni sulinissaminnut tulluartinneqannginnerannik imaluunniit timmisartortartunngorniartup ilinniakkaminik unitsitsineranik sulianik nalilersuisarpoq.
Air Greenlandip timmisartornermut pisortaata aalajangiinera inaarutaasuuvoq.

Ilinniarfiup aamma Air Greenlandip akornanni isumaqatigiissusiortoqarsimavoq, tassani pineqarluni timmisartortartunngorniaq Inuussutissarsiutigalugu timmisartortartutut ilinniarnermi anguniakkat angusimanngikkaangagit Air Greenland ilisimatinneqartassasoq.

Inuussutissarsiutigalugu timmiartortartunngorniarninni nunatta avataani ilinniakkanut ilinniagaqarnersiuteqarnissamik qinnuteqarfissamut immersuiffissamik immersuinikkut qinnuteqarsinnaavutit:
Qinnuteqaat kingusinnerpaamik ulloq 1. marts Københavnimi Kalaallit Illuannut uddannelse@sumut.dk nassiunneqassaaq.

Qinnuteqaammut inuuneq pillugu allaaserisaq ilanngunneqassaaq.
Qinnuteqaatit Kalaallit Illuanni ilinniarnermut siunnersuisunit suliarineqassaaq, tassani nalilersorneqassalluni Namminersorlutik Oqartussat Kalaallit Nunaata avataani ilinniarnissamut ilinniagaqarnersiuteqarnissamut piumasaqaatit naammassisimaneritit.
Tiguneqarnissamut piumasaqaatit naammassisimagukkit marsip qeqqata missaani ilinniagaqarnersiuteqalernissamut neriorsuummik piumasaqaatitalimmik nassinneqassaatit, qinnuteqaatit taassuma kingorna Air Greenlandimut inaarutaasumik aalajangigassanngorlugu tunniunneqassaaq.

Kalaallit Nunaata avataani ilinniagaqarnersiutit pillugit paasissutissat sukumiinerusut uani nassaarisinnaavatit:

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit
• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit
• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk

Air Greenlandimi sullissisup qinnuteqaatitit suliarissavai. Taamaattoq ilinniagaqarnersiutinik Kalaallit Illuinut qinnuteqassaatit, taakku isumagisaramikkit.
Ilinniarnerup aallartinnissaanut sapaatip akunneri pingasut inulersimappagit illillu suli akissutisinak, Air Greenlandimut Kalaallillu Illuinut saaffiginnittariaqassaatit.

Ilinniarnermik aallartiffik
Ilinniarneq augustimi septemberimiluunniit aallartittarpoq, kisianni aprilimi majimiluunniit peqqissutsimut allanillu misissortinnissamut piareersimassaatit.

Neqeroortoq
Air Greenland & Center Air Pilot Academy

Aningaasaqarneq
Air Greenland A/S aamma Namminersorlutik Oqartussat nunatsinni politinngorniarfimmut tunngatillugu suleqatigiinnissamut aningaasalersuinissamullu isumaqatigiissuteqarsimapput. Isumaqatigiissut taanna naapertorlugu timmisartortartunngorniartussatut tiguneqarsimasut ilinniakkamut aningaasartuutit affaannik akiliissapput. Nammineq aningaasalersuineq Ilinniagaqarnersiuteqarfimmit immikkut 350.000 - 400.000 kr. missaannik taarsigassarsisoqartarpoq taarsigassarsiallu allatut ilinniarnerup nalaani erniaqaratillu akilersugassaanatik.
Danmarkimi ilinniagaqarnersiuteqarnissaq, SU, aamma ilinniakkavit akilerneqarnissaanut tapiissutinik qinnuteqarsinnaavutit. SU-nik qinnuteqarit uanilu annertunerusumik paasisaqarit http://www.su.dk/).

Suliffimmik misiliinermi pissutsit
Suliffimmik misiliissanngilatit

Piginnaasat qaffasissusaat
-

Siunissami periarfissat / Suliffiusinnaasut
Inuussutissarsiutigalugu timmisartortartutut naammassiguit timmisartuutileqatigiiffinni angisuuni minnerniluunniit atorfinnut qinnuteqarsinnaavutit. Taakku tassaasinnaapput angalaqatigiittunut attartorluni timmisartuussineq, ingerlaartarfikkut timmisartuussineq, namminerisamik timmisartunik imaluunniit taxamik timmisartuussineq.

Ineqarneq
Air Greenland inimik pisatsersukkamik attartugassiisinnaavoq, ilinniartullu ilinniarnermini maanna akilertassavaa 3.200 kr./qaammammut.

Ilinniarnermik aaqqissuussineq

Uani paasisaqarnerusinnaavutit:

Suliap suliarineqarneranut imaluunniit allat pillugit naammagittaalliutissaqaruit grl-fp-hr@politi.dk. attaveqarfigissavat.

Timmisartortartutut ilinniarneq pillugu isumaqatigiissut