Pædagogassistenti

Pædagogassistentitut Inuutissarsiummik ilinniarneq 120 ECTS-point- inut annertussusiligaavoq. Ilinniarneq immikkoortunut 4-nut agguarsimalluni ukiuni 2-nik sivisusseqarpoq, tassani paarlakaanneqarlutik suliffimmi sungiusarneq aamma modulini ilinniarnerit pilersaarutaareersut.
Ilinniarneq suliffimmi sungiusarnerit aammalu modulini ilinniarnerit paarlakaanneqarnerinik aaqqissuussaammat, naatsorsuutigineqarpoq ilinniartoq ilinniartuunini tamakkerlugu perorsaanermik suliffeqarfimmut attuumassuteqassasoq.

Ilinniartitaaneq ilinniartunut persorsaanermik suliaqarnemut attuumassuteqartunut sammitinneqarpoq, aammalu ulluinnarni suleriaatsinik tunngaveqarluni. Ilinniartitaaneruvoq paarlakaattumik ingerlaaseqartoq, piffissap ilaani suliffimmi ingerlanneqartarluni piffissallu ilaani ilinniarfimmi modulikkaartuusuni ingerlanneqartarluni. Ilinniartut ulluinnarni suleriaatsit misilittagaat aamma suliaqarnikkut piginnaasaat ilinniartitaanermi atuagarsornermi aammalu perorsaanermi sakkunut tunngatillugu tunngaviusarput, soorluttaaq ilinniartup ilinniarnermini ilisimalersimasani aammalu piginnaasarilersimasani ulluinnarnisuliffimmisuleriaaseqarnerminut atatillugu iluaqutigisarai. Ilinniartitaanerup siammasissumik ingerlanneqarsinnaanera neqeroorutaavoq, ilinnialernissamut piumasaqaatinik naammassinnissimasut amerlassusaat eqimattaliornissamut naammassimagaangata, aammalu ilinniarnissamut sinaakkutit pitsaasut pilersinneqarsinnaagaangata. Kalaallit Nunaanni tamarmi perorsaasoqarnerup tungaatigut suliatigut piginnaasanik qaffassaanissaq ilinniartitaanerup aamma siunertaraa. Ilinniartitaaneq aamma piffissap ilaannaa atuagarsornernut aaqqissuunneqarsinnaavoq, ullukkut imaluunniit ulloq unnuarlu paaqqinniffinni atorfeqartunut ukiut arlallit perorsaanermik misilittagaqartunut sammisumik, taamaalilluni soorlu assersuutigalugu ullukkut imaluunniit ulloq unnuarlu paaqqinniffinni atorfeqaatigaluni ilinniagaqaqqinnissamut periarfissiisumik. Ilinniartut pædagogassistentitut Inuutissarsiummik ilinniarnermik naammassinnittut Isumaginninnermi Perorsaanermi atorfinissutissamik Bacheloritut ilinniagaqalernissamut akuerineqarnissamut qinnuteqarsinnaapput.

Pædagogassistentitut Inuutissarsiummik ilinnialernissamut akuerineqarnissamut qinnuteqartumut piumasaqaataapput:

• ilinniarnertuutut naammassisimanissaq soorlu assersuutigalugu GUX-imi, HTX-imi imaluunniit assigisaanik, imaluunniit
• isumaginninnermut sammisumik inuutissarsiummik ilinniagaqarsimanissaq, soorlu assersuutigalugu isumaginninnermi ikiortitut, socialassistentitut, peqqissaanermi ikiortitut imaluunniit   siunnersuinermi ikiortitut, imaluunniit meeqqat atuarfianni inaarutaasumik misilitsinnerup saniatigut allap ilinniartitaanerup attuumassuteqartup akuerisaasullu naammassisimanissaa, soorlu   assersuutigalugit isumaginninnermi perorsaanermik suliaqarnerup iluani, attaveqatigiinnermik, oqaloqatigeeriaatsit pillugit imaluunniit assigisaannik pikkorissarnerit sivisunerusut, aamma
• ilinniarnissamut pilersaaruteqarnissaq, tassunga ilagitillugu ukiuni 2-ni isumaginninnermi perorsaasutut suliffimmi ullukkut imaluunniit ulloq unnuarlu paaqqinniffimmi PI/SPS-ip akuerisaani   sungiusarluni sulinissamut isumaqatigiissuteqarnissaq.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniartitsineq qaammammi martsimi aallartissaaq

Neqeroortoq
Perorsaanermik Ilinniarfik (PI/SPS)

Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.

Suliffimmik misiliinermi pissutsit
Ilinniarnertuut ilinniarfianni teorii ullup ilaannaa ingerlatsillugu suliffimmik misiliineq ingerlanneqarneq ajorpoq, ilinniartoq ilinniarnermini saniatigut suliffeqareerami

Siunissami periarfissat/ Suliffiusinnaasut
ilinniarnermik naammassereeruit ukunani atorfininniarsinnaavutit ulluunerani paaqqinnittarfiit aamma ulloq unnuarlu paaqqinniarfiit.Ilinniakkavit ilinniaqqinissannut ilinniagassanut qaffasinnerusunut periarfissiissaaq.

Ilinniarnermik aaqqissuussineq
Uani atuagaaraq aasinnaavat: https://pi.sps.gl/wp-content/uploads/2024/04/Gaeldende-DPAU-Paedagogassistent-studieordning-KA.pdf

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.