Perorsaanermik ilinniarfik immikkut ilinniagalik

Ilinniagaq ukiumut ataatsimut annertussuseqartutut aalajangersarneqarpoq katillugu 60 ECTS pointeqartumik – katillugit 1.650 tiimit missaanni suliaqarfiusussatut. Ilinniagaq ukiuni 2-ni sivisussuseqarpoq, modulinullu pinngitsoorani peqataaffigisassanut 3-nut 10 ECTS pointilinnut – modulimut 275 tiimit missaannik suliaqarfiusussanut kiisalu modulimut nammineq toqqagassamut 1-mut 10 ECTS pointilimmut kiisalu modulinut nammineq toqqagassanut 4-nut 5 ECTS pointilinnut – modulimut toqqakkamut ataatsimut 140 tiimit missaannik suliaqarfiusussamut agguarneqarluni.
Immikkut pisariqaqartitsisunik Perorsaanermi Ilinniakkamut tamarmut ilinniartut katillugit 60 ECTS pointinnassapput, taakkunani modulit pinngitsoorneqarsinnaanngitsut 45 ECTS-iussallutik kiisalu modulit marluk toqqarneqarsinnaasut 15 ECTS-iussallutik; tassaasinnaallutik 3 x modulit 5 ECTS-inik, imaluunniit 1 moduli toqqarneqarsinnaasoq 5 ECTS-inik aamma 1 moduli toqqarneqarsinnaasoq 10 ECTS-inik nalillit.

Modulit nalinginnaasumik ulluni 4-9-ni sivisussuseqartarput, atuartitsinerup saniatigut nammineq ilinniarnissamut pilersaaruteqarpoq, tassani piginnaasakinnerusunik perorsaanermit isiginnittaatsinut toqqakkanut atatillugu perorsaanermi ilisimasat periutsillu sulissutigineqartassallutik. Unnukkut aamma sapaatip-akunnerisa naanerini atuartitsisoqartarsinnaavoq.

Modulit akornanni ilinniartoq aamma studiegruppinut ilinniaqatinullu saqqummiinissamut attaveqarnissamut isumaqatigiissuteqarnissamullu, modulit akornanni malittareqqiinermut piareersarnermullu ilaatigut atuakkanik atuarnikkut, ulluinnarni sulinermi sungiusarnerup nanginneranut, kiisalu allattariarsorluni allatullu suliassanik pinngitsoorsinnaanngisanik piffissaliisassaaq.

Ilinniagaq ilaatigut qallunaatut ilaatigullu kalaallisut ingerlanneqassaaq – atuartitsisut aallaavittut qallunaatut oqaaseqassapput, sungiusarnerilli eqimattani minnerni kalaallisut ingerlanneqarsinnaapput.

Atuakkat teoriillu amerlanerpaartaat aamma qallunaatut allassimassapput, ilaatigulli kalaallisut allatat, nalunaarusiat il.il. ilanngunneqassapput, soorlu aamma allatanik atugassanik tuluttut allassimasunik takkuttoqarsinnaasoq. Allattariarsorluni suliassat aallaavittut qallunaatut tunniunneqartassapput.

Ilinniartut modulini Ilulissani Perorsaanermik Ilinniarfimmi atuariartorlutik katersuuttassapput, ilinniakkami pingaaruteqarluinnarmat, ilinniartut nalinginnaasumik suliffimi avatangiisimilu avataani ilikkariartorfissami naapittarnissaat, taamaasillutik akornusersorneqarnatik atuartitsinermut suliatigullu misileraanernut pulalluarsinnaaniassammata.

Pisariaqarfiini internettikkut atuartitsineq atorneqartarsinnaavoq. Modulini takkulluni najuuffissani atuartitsinermut ilassutaasinnaavoq. Modulit atuartitsiffiusut akornanni aqqutissiuussineq utertitsiffigineqarnerlu internettikkut neqeroorutigineqassapput, soorlu ilinniartut internet atorlugu eqimattakkaarnermi suliassanik pilersaarusiorlutillu naapittarsinnaasut.

Ilinniartut Piginnaasakinnerusunik Perorsaanermi Ilinniakkamut imaluunniit modulinut ataasiakkaanut tiguneqartarput qinnuteqartoq:

• Ingerlariaqqiffiusumik ilinniakkamik isissutaasinnaasumik minnerpaamik inuussutissarsiummik ilinniagartuutut ilinniakkatut qaffasissusilimmik naleqquttumik naammassinnissimassasoq,
• Ilinniakkamik isissutaasinnaasumik nammassinnereernerup kingorna naleqquttumik perorsaanermi inuussutissarsiornermi minnerpaamik ukiuni 2-ni misilittagaqassasoq,
• Qallunaatut atuarsinnaanermut, paasisinnaanermut oqaasertalersuisinnaanermullu oqaatsitigut piginnaasaqassasoq aamma
• Sulisitsisumut ilinniarnissamut isumaqatigiissuteqassasoq.

PI/SPS-ip aamma qinnuteqartut qulaani piumasaqaatinik naammassinnissimanngitsut tigusinnaavai, kisianni Piginnaanernik Pigineqareersunik naliliineq tunngavigalugu qulaani tiguneqarnissamut piumasaqaatinut taaneqartunut ilinniagaqarnikkut sulinikkullu tunngaveqartutut nalilerneqarpata. Piginnaanernik Pigineqareersunik Nalilersuineq (RKV) PI/SPS-imit suliarineqassaaq ilinniagaqarnermut inuussutissarsiornermullu misilittakkat pillugit uppernarsaatit nassiunneqartut ataatsimut isigineri kiisalu ilinniarnerup aallartinnginnerani oqaloqatigiinneq aamma/imaluunniit tiguneqarnissamut misilitsinneq aallaavigalugit.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Ilinniarfiup qinnuteqarfigineqartup illit qinnutitit suliarisussaavai, ingerlaavartumik akissuteqarfigineqartassaatit. Ilinnialernissap aallartinnissaanut sapaatit akunnerit pingasut inulerpagit sulilu tusagaqarsimanak, ilinniarfimmut attaveqartariaqassaatit.

Ilinniarnermik aallartiffik
Ilinniagaq ingerlaavartumik aallartittarpoq

Neqeroortoq
Perorsaanermik Ilinniarfik (PI/SPS)

Aningaasaqarneq
Sulisitsisunniit akissarsiaqassaatit, tamanna pissutigalugu ilinniarnersiutinik imaluunniit ilinniartut akissarsiaanik pisinnaanngilatit.

Suliffimmik misiliinermi pissutsit
Suliffimmik misiliissanngilatit

Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 6 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit .Ingerlaqqiffiusumik inersimasunik ilinniartitaanermi piginaasat qaffasissusaat

Siunissami periarfissat / Suliffiusinnaasut
Ilinniakkamik naammassinnereernermi ukunani atorfininniarsinnaavutit:

• Ulluunerani paaqqinnittarfinni
• Ullukkut unnuakkullu paaqqinnittarfinni
• Minnerit atuarfianni
• Innarluutilinni
• Utoqqarni
• Pinerluttunik isumaginnittoqarfimmi
• Siunnersuinermi pitsaaliuinermilu suliaqarneq

Ilinniakkavit ilinniaqqinissannut ilinniagassanut qaffasinnerusunut periarfissiissaaq

Ilinniarnermik aaqqissuussineq
Uani atuagaaraq aasinnaavat: https://pi.sps.gl/ka/immikkut-pisariaqartitsisunut-sammilivimmik-perorsaanilerinermi-ilinniarneq/

Suliap suliarineqarnera imaluunniit alla pillugu naammagittaalliorusukkuit ilinniarfik attavigissavat.