Politeeq

Politiitut ilinniarnerup eqqarsartaatsikkut timikkullu ineriartortissavaatit. Siunissannut tamakkiisumik toqqammavissiisarpoq sulinermilu ineriartornissanik amerlasuunik ammaassisarluni.
Politiitut sulinerni ingerlaannaq misigissavat ulluni misigisassat assigiinngittuaannartuummata. Aamma Politiinngorniat atuarfianni taamatut aallarteriissaatit. Ilinniarnermi ileqqutit arlallit atulissavatit, atuakkatigut ilisimasatit inerisassavatit kiisalu politiitut sulinermi piginnaasatit ineriartortissallugit.

Politiinngorniarneq ukiuni marlunni qaammatinilu sisamani ingerlasarpoq - qaammatit aqqanillit siulliit Nuummi Politiinngorniat atuarfianni Nuummi qaammatini aqqanilinni sungiusarluni sulinermik malitseqarluni kiisalu Nuummi Politiinngorniat atuarfianni qaammatini arfinilinni naggaserneqartarluni.

Politiinngorniat atuarfianni aallartissaguit maligassiuinermut akisussaassueqarnerlu politiit uniformiannik atuinissamut atatillugu naammassisinnaasariaqarpatit. Taamaammat inuttut, timikkut, peqqissutsikkut ilinniarsimanermullu piumasaqaatit naammassisimassavatit, aamma qallunaatut oqalussinnaallutillu allassinnaassaatit - imaluunniit ilinniarnissaannut piumassuseqassaatit.


Ilinniakkap sannaa

Semesteri siulleq
Tassani qaammatini aqqanilinni atuarfimmiissaatit, "aqqusinermi" nakkutilliisutut sulinissamut atortussatit tamaasa ilinniassavatit. Timikkut atuagarsornermillu sammisaqassaatit soorlu politiit pillugit inatsiseqartitsineq, aaqqiagiinnginnernik aaqqiiniarneq kiisalu nukkassarneq.

Semesterit aappaa
Tassani qaammatini aqqanilinni upalugaarsimanermi sulillutit sungiusassaatit, misissuilluni angalaarnermi peqataassallutit, nalunaarusiorlutit kiisalu pinerlunnernik pitsaaliuillutillu misissuinermik misiliissallutit.

Semesterit pingajuat
Tassani qaammatini arfinilinni atuarfimmeeqqissaatit, tassani misissuinerit pillugit atuartitsinerni ilaallutit ilaatigullu uppernarsaatinik qularnaarineq tunniussinerlu misilittarlugit, pinerlussimanermi teknikkikkut misissuinerit allarpassuillu misilittarlugit.

Ilinniakkap qanoq aaqqissugaanera pillugu imaluunniit aallartinnissamut akuerisaanissamut piumasaqaatit pillugit apeqqutissaqaruit uunga allannissannut tikilluaqqusaavutit grl-fp-hr@politi.dk.

 

Aallartinnissamut piumasaqaat

Politiinngorniarfimmi aallartinniaruit tunngaviusunik piumasqaatinik naammassinnissimassaatit.
Illit:

• 21-vileereersimassaatit (qanoq utoqqaatiginermut killeqanngilaq)
• qallunaatut innuttaassuseqassaatit - imaluunniit innuttaassuseqarnissamut qinnuteqarsimassaatit
• peqqissuussaatit
• biilinik inerlatsisinnaanermut allagartaqassaatit
• ilinniarnertuunngorsimassaatit, inuussutissarsiummik ilinniagaqarlutit imaluunniit sulinermik misilittagaqarlutit
• qallunaatut oqaatsitigut allattariarsornikkullu piginnaaneqartutit - imaluunniit ilinniarnissaannut piumassuseqartutit
• isumannaallisaanikkut akuerineqarsinnaassaatit.

Ilinnialernissamut misilitsinnerit
Qinnuteqaatit misissorlugu nalilersoreerutsigu Nuummut misilitsinnissamut qaaqquneqarsinnaavutit. Misilitsinnerit tassaapput timikkut misilitsinnerit, allattariarsornikkut misilitsinneq, suleqatigiinnissamut suliakkiussamik suliaqarneq kiisalu kisimiitillutit oqaloqatiginninneq.

Aallartinnissamut misilitsinnerit annikitsuaraannartut eqqarsaatersuuteqarfigissanngilatit, taamaammat maanna Politiinngorniat atuarfiannut qinnuteqarniarlutit nalunngikkukku maanna piareersalereertariaqarputit.

Nuummi najugaqanngikkuit aallartinnissamullu misilitsinnissamut qaaqquneqassaguit peqataanissamut attuumassuteqartunik aningaasartuutit politiinit akilerneqassapput.

Piumasaqaatit nalinginnaasut naammassisimagukkit aallartinnissamut misilitsinnissamut qaaqquneqassaatit, tassanilu piareersarluarsimanissat pingaaruteqarpoq. Uku misilitsinnerit naammassissavatit:

• Qalipaatit pillugit misilitsinnerit
• Timikkut misilitsinnerit (nalinginnaasumik misilitsinneq, sukkassutsimik misilitsinneq, pissilluni misilitsinneq, timinik kivitsinerit, bænkpres kiisalu 2400 meterimut appanneq)
• Allattariarsorluni misilitsinneq (qallunaatut assersuummik suliaqarnermi)
• Suleqatigiilluni suliassaq
• Ataasiakkaarluni oqaloqatigiinnerit.

Politiitut sulissagaanni maligassiuilluartuunissaq pingaaruteqarpoq. Taamaammat ataasiakkaarluni oqaloqarnerni allanut misiginneqataasinnaanerit, suleqatigiinnermik pisinnaasatit, tarnikkut oqimaaqatigiissutsit pissutsinullu naapertuuttunik paasinnittarnerit nalilersorneqassapput.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatitit Kalaallit Nunaanni Politiinit suliarineqartussaapput, ingerlaavartumik akissutisisarumaarputit. Ilinniarnerup aallartinnissaanut sapaatip akunneri pingasut inulersimappagit illillu suli akissutisinak, ilinniarfimmut saaffiginnittariaqassaatit.

Ilinniarnermik aallartiffik
Ilinniartitsineq qaammammi augustimi aallartissaaq

Neqeroortoq
Kalaallit Nunaanni Politiit

Aningaasaqarneq
Ilinniarnerit tamaat tamakkiisumik akissarsiaqassaatit, atorfeqarnermullu atatillugu Politiit inissaqartitsissapput illit attartorsinnaasannik. Nuup avataaneersuuguit Danmarkiminngaanneerlutilluunniit ilinniarnerup aallartinneranut atatillugu pequttanik nutserineq isumagissavarput.

Suliffimmik misiliinermi pissutsit
Suliffimmik misiliissanngilatit

Siunissami periarfissat / Suliffiusinnaasut
Politiitut naammassisimaleruit ilinniaqqissinnaavutit soorlu qimmeqarnermut tunngasumik, PET-mi ilinniaqqinneq, suligasuartussani nakkutilliisoq imaluunniit aningaasaqarnermut tunngasuni imaluunniit it-mik pinerlunnernut tunngasunik immikkut ilinniaqqissinnaallutit.

Politiini sulinermi ingerlariaqqiffissat sisamat pingaarnerit tassaapput:

• Upalungaarsimaneq
• Misissuineq
• Pinaveersaartitsineq
• Misissuneq aamma misissueqqissaarneq

Ineriartornissamut ataasiinnarmut pituttorsimassanngilatit.

Ilinniarnermik aaqqissuussineq

Uani atuagaaraq aasinnaavat:
https://gbs.gl/wp-content/uploads/2024/01/Studieordning-AU-OA.pdf

 

Suliap suliarineqarneranut imaluunniit allat pillugit naammagittaalliutissaqaruit grl-fp-hr@politi.dk. attaveqarfigissavat.