Tusagassiortoq (BA)

Alapernaatsuuit aamma inuiaqatigiinni sammisat pingaarutillit pillugit misissuineq, qulaajaaneq ingerlatitseqqiinerlu suliarerusuppigit?

“Tusagassiortutut ilinniarninni tusagassiuutini naqitani, TV-mi, radiumi aamma nittartakkatigut tusagassiortutut suliassanik ilinniartinneqassaatit” - Naja Paulsen, immikkoortortaqarfimmi pisortaq

Ilinniagaq atorfininnissaq siunertaralugu bachelorinngorniarneruvoq teoreertalu suliamut sammivoq.
Tusagassiornermik periutsit piginnaaneqarfigilissavatit aamma inuiaqatigiit kalaallit ilusaat aaqqissugaanerallu paasisaqarfigissavatit.
Ilinniarnermi piumasaqaataapput suleqateqarluarsinnaassuseqarneq, imminut naalakkersinnaaneq nammineersinnaanerlu, tassami tusagassiortuunermi ujartuisinnaaneq nammineerlunilu aallarnisaasinnaaneq pineqarput.

Ilinnut ilinniartitsissutigineqassapput tusagassioriaatsit tamarmiusut - naqitat, tv, radio, web aamma attaveqaqatigiinneq. Tusagassioriaatsit assigiinngitsut tunulequtaralugit sulineq ilinniassavat kiisalu tusagassiortutut atortussanik periutsinillu assigiinngitsunik ilinniartinneqassaatit. Pineqartut tassaapput isumassarsianik ineriartortitsineq, paasisassanik katersuineq, oqaluttuariniakkap sammivilernissaa, apersuineq kiisalu saqqummiineq.

Tusagassiornermi pitsaasumik eqqarsaatiginninneq misissueqqissaarinerlu pineqartarput pisariaqartinneqarpullu ilisimasaqarneq, ileqqorissaarneq pissuserissaarnerlu. Taamaattumik inuiaqatigiit nunarsuullu aaqqissuussaanerat pillugit, maleruagassat aamma apeqqutit ileqqorissaarnermut tunngasut qanoq pineqassanersut, kiisalu teorii atorlugu inuttut piginnaasatit qanoq ineriartortissinnaaneri pillugit ilinniassavatit.

Tusagassiornermut bachelorinngorniarneq ukiut sisamaata affaanik sivisussuseqarpoq, taakkunannga ukioq ataaseq suliffimmi aningaasarsiaqarluni sungiusarnerulluni. Tamatuma kingorna ilinniarnerit qaffassarlugu kandidatimut - cand.public ingerlaqqinnissannut periarfissaqarputit. Tusagassiornermut Kandidatgrad ingerlavigeqqinneratigut nalinginnaasumik tusagassiortutut ilinniagaqarnerit pitsanngorsarsinnaavat itinerusumillu illinniakkamut tunngasumik sammisaqarlutit. Kandidatimut ingerlaqqinnermi ukiut marluk atorneqartarput.


Tusagassiornermi bachelorinngorniarluni ilinniarnerup ilaani ukioq ilivitsoq tusagassiuutit arlaanni paasissutissiisarfimmiluunniit sungiusaatigalugu sulinermut atorneqartussaavoq.
Sungiusaatigalugu ilinniartutut naqitanut, radiomut, web-imut tv-mulluunniit oqaluttuassanik suliaqaqataasartussaavutit.
Aamma ilinniarnerup iluani pingaartuuvoq tusagassiornerup imaqqortuup assigiinngitsutigut ilinniagaqarfiginissaa. Taamaattumik sungiusaatigalugu sulininni sulliviit minnerpaamik assigiinngitsut marluk misilittariaqarpatit.

Tusagassiornermik Immikkoortortaq tusagassiorfiillu annerit sungiusaatigalugu sulinissaq pillugu isumaqatigiissusiortarput, taamaattumillu tusagassiornerup iluani pilerinartitatit misilittaaffigissallugit periarfissaqarluarputit. KNR tassaavoq suliffeqarfik ilinniartitsinnik sungiusaatitsinerpaasartoq, pingaartumik Qanorooq Radioaviisilu ukiut tamaasa sungiusaatigalugu sulisitsisarmata. Taakkua saniatigut aviisit Sermitsiaq AG-lu kiisalu Nuuk TV Nuummi sungiusaatigalugu suliffitsialaapput. Taamatulli sulinissamut avataani aamma periarfissaqarpoq, soorlu Qaqortumi Ilulissanilu KNR-p immikkoortortaani sungiusaammik sulisoqarsinnaammat, tassani siunnersortissat pigineqarpata. Taamatullu aamma Danmarkimi sungiusaammik sulisoqarsinnaavoq aaqqissuisoqarfiit malittarisassat malillugit taamatut sulisoqarnissamik akuersippata.

Suliffeqarfiit kommunellu ullumikkut paasissutissiisarfeqarmata sungiusaammik sullivittut aamma atorneqariartuaalerput, piumasaqaatit soorlu allaffissaqartitaaneq aningaasarsiaqartussaaneq siunnersorteqarnissarlu naammassineqarsimagaangata. Taakku ilagaat Tele Greenland A/S,Mittarfeqarfiit A/S kiisalu Royal Greenland A/S.

Tusagassiornermik Immikkoortortap tusagassiorfiillu ilinniarnerup sungiusaatigalugu sulinertaqarnissaa pingaartittorujussuvaat, tusagassiornerummi iluani piviusut misileraaffigissagakkit, deadlinet pingaarutaat paasisariaqarakku kiisalu tusagassiat amerlasoorpassuarnit takuneqarlutillu isiginnaarneqartussat suliarisartussaagakkit. Taamaattumik Tusagassiornermik Immikkoortortap qulakkeerniartarpaa ilinniartut unamminartumik ilikkarnartumillu sungiusaatigalugu ilinniarfeqarnissaat.

Sungiusaatigalugu sulliviit tamarmik ilinniarsimasumik siunnersorteqartarput taamaalillutillu sungiusaatigalugu sulisut ilinniagassatigut pilersaarusiorfigineqartarlutik taamalu sungiusaatigalugu sulinerup nalaani TI qanimut attavigineqartarpoq.

Sungiusaatigalugu sulineq akissarsiagissaarfiusarpoq. Dansk Journalistforbund aamma Naalakkersuisut tusagassiortunngorniat pillugit isumaqatigiissuteqarput akissarsiaqartitsinermi malinneqartussamik.

GUX-imi inaarutaasumik misilitsissimaneq isernissamut piumasaqaataavoq. Naatsorsuutigineqassaaq fagit kalaallisut qallunaatullu A-mik qaffasissuseqassasut aammalu minnerpaamik karakteri C pissarsiarineqarsimassasoq. Tuluttut qaffasissuseq B-unissaa naatsorsuutigineqassaaq minnerpaamillu karakteri angusassaq D-ulluni. Kalaallisut/qallunaatullu naligiimmik isissutaasinnaasumik misilitsinnikkut nunanit allaneersut karakterit atorneqarsinnaapput.

Ilinnialertussanut siunnersuutigineqarpoq ilinniakkatigut sammivimmik inuiaqatigiilerinermut attuumassuteqartumik naammassisaqarsimanissaq.

Bachelorinngorniarluni ilinnialernissamut akuerisaanissaq, inaarutaasumik aalajangiisussaq tassaavoq misilitsinneq. Misilitsinneq ima ilusilersugaavoq, qinnuteqartoq tusagassiortutut eqqarsarsinnaanera, inuiaqatigiinni ilisimasanut nalinginnaasunut paasisimasaqassusaa taamatullu kalaallisut, qallunaatut tuluttullu piginnaasai takutissinnaallugit. Tusagassiornermik Immikkoortortaq/Afdeling for Journalistik qinnuteqartoq allamik ilinniagaqarsimappat, ilinniagarisimasarlu ilinniagaqalernissamut naammattutut institutrådip nalilerpagu, immikkut akuersissuteqarsinnaavoq.


Isissutissamik misilitsinneq:
TI ukiut tamaasa ilinniartussarsiortarpoq 1.september atualersussanik. Tusagassiornermik Immikkoortortamut iserniaruit GU-mi assigisaanniilluunniit angusisimasariaqarputit. Qinnuteqaatit martsip aallaqqaataat nallertinnagu nassiutereersimassavat.
Taava misilitsinnissamut qaaqqusaassaatit. Tamanna pigajuttarpoq apriilip qaammataani.
Misilitsinnerit Nuummi, Sisimiuni, Aasianni, Qaqortumi isumaqatigiissuteqarnikkulluunniit pisinnaapput.
Misilitsissutissat tallimanik immikkoortortaqarput. Ilisimasariaqakkanik misilittaaneruutigaluni tusagassiortumut suliassiissutitaqarpoq kiisalu kalaallisut, danskisut tuluttullu oqaatsitigut piginnaasanik misiliinerulluni. Maajip ulluisa 31-at tikitsinnagu misilitsinnermi angusisimanersutit angusinngitsoorsimanerlutilluunniit tusartussaavat.
Tusagassiornermik Immikkoortortami sulisut misilitsittarnermut tunngasut pillugit sukumiinerusumik paasiniaaffigisinnaavatit, ilaatigut qanoq piareersarluarsinnaanersutit paasiniarlugu. Ukiuni kingullerni misilitsittartut affaasa missingi angusisarput taamalu Tusagassiornermik Immikkoortortami/TI-mi ilinnialersarlutik.

Ilinniakkamik imaluunniit ilinniagaqarnersiutinik qinnuteqassaguit imminut sullinnermut toorsiffissaq sungaartukkut qarasaasiakkut/internettikkut tassani quppernermi qulaani saamiatungaaniittukkut ”Maana qinnuteqarit”-kut qinnuteqassaatit. Imminut sullinnermi periarfissat atussagukkit nammineq inuttut MitID-nnut isissaatit.

Uku atussavatit

• MitID
• Pappilissat ilinniagarisimasamut tunngasut (meeqqat atuarfianni karakteerinut uppernarsaatit atuutinngillat 2007-ip kingorna meeqqat atuarfiannit atuarunnaarsimaguit)
• Suli meeqqat atuarfianniikkuit karakteerit kingulliit allattorsimaffiat atussavat.

Uku atussanngilatit

• Kuisinnermut allagartaq
• Najugaqarnermut uppernarsaat
• Nunatsinni meeqqat atuarfiannit karakteerinut/angusanut uppernarsaatit (2006-ip missaanit ulloq manna tikillugu karakteerit pisortat paasissutissaasivianniipput).

Malugiuk
Karakteerit marlussuit amigaatigigukkit imaluunniit meeqqat atuarfianni inaarutaasumik misilitsinnerni angusisimanngikkuit Majoriat tamarmik piginnaanngorsaanissamik neqerooruteqartarput.

Najukkanni Majoriamit qinnuteqarnissannut ikiorneqarsinnaavutit, aamma allatut siunnersorneqarnissannut ikiuisinnaapput.

Ilinniartunut inissiamik pinngitsoornak neqeroorfigineqarnissat naatsorsuutigisinnaannginnakku maluginiassavat. Ingerlaannartumik ilinniartunut inissiamik tunineqanngikkuit Majoriami immikkut qinnuteqartariaqassaatit.

Immikkut ittumik pisoqartillugu pappialatigut qinnuteqarfissamik najukkanni Majoriamit tunineqarsinnaavutit. Qarasaasiakkut/internettikkut qinnuteqarsinnaanngikkuit najukkanni Majoriaq attavigiuk.

Qinnuteqaatit Ilisimatusarfimmit suliarineqassaaq, ilinniagaqarnersiuteqarnissamut qinnuteqaatit Ilinniagaqarnersiuteqartitsivimmit suliarineqassalluni, kisianni taakku tamarmik Ilisimatusarfimmit allaffissornikkut aqunneqassapput.

nalunaarfigineqassaatit akuerisaasimanerlutit imaluunniit akuerisaasimannginnerlutit.

Eqqaamallugu ilumut ilinnialerniarlutit nalunaarutigissagakku.

Qinnuteqarnerpit nalaani suli soraarummeersimanngikkuit akuerineqarsinnaavutit soraarummeerninni angusisimanissat piumasaqaatiginerqarluni.
Eqqaamallugu soraarummeersimanermut uppernarsaat nassiunneqassammat kingusinnerpaamik juunip 29-ani.

Ilinniarnerup qaqugu aallartinnissaa, ilinniagaqarnersiutit il.il. pillugit kigusinnerpaamik 15 januaari Iliisimatusarfimmit ilisimatinneqassaatit.

Ilinniarnermik aallartiffik
Ilinniagaq ingerlaavartumik 1 septembari

Neqeroortoq
Ilimmarfik

Aningaasaqarneq
Sullissivik aqqutigalugu ilinniarnersianik ilinniarninni qinnuteqarsinnavutit
Ilinniartut aningaasarsiaanik suliffinni misiliinermi akissarsiaqassaatit, aamma tiimimusiat assigiinngissinnaaput apequutallutik misilittagaqarsimaneq, ukiutit tapisiallu.

Suliffimmik misiliinermi pissutsit
Suliffinni misiliiffissamik nassaareersimanissamut piumasaqaateqanngilaq.

Piginnaasat qaffasissusaat
Ilinniagaq inuunerup ingerlarngani ilinniarnermi piginnaasat qaffasiffiisa sinaakkutai 6 inissisimapput. Piginnaasat qaffasiffiisa sinaakkutai 1-mit 8-mut qaffasissuseqarput atuartitsinermullu pissarsiassatut naatsorsuutigineqartut nassuiarpaa. Atuaqqinnerugit .Ingerlaqqiffiusumik inersimasunik ilinniartitaanermi piginaasat qaffasissusaat

Siunissami periarfissat / Suliffiusinnaasut
Tusagassiortutut ilinniagaqaruit tusagassiuutit assigiinngitsut suliffigisinnaavatit, soorlu TV-qarfiit, radiukkut aallakaatitsiviit, nittartakkanik aaqqissuisoqarfiit, aviisit aamma attaveqaqatigiinnermut immikkoortortaqarfiit il.il.
Immikkoortut aalajangersimasut iluini immikkut ilinniagaqarsinnaavutit, soorlu nunami namminermi pissutsit, nunani allani pissutsit, kulturi, pinerluttarnerit il.il.
Aamma nutaarsiassaqartitsivimmi pituttugaanak (imitittartoq) aalajangersimasumilluunniit atorfilittut sulisinnaavutit.

Ilinniarnermik aaqqissuussineq
https://da.uni.gl/media/2vvhgbdx/journalistik-studieordning.pdf

Isumaqaruit Ilisimatusarfiup akuerineqarnissannik aalajangiinera maleruagassanik unioqqutitsisinerusoq maalaarsinnaavutit. Maalaarut allaganngorlugu nassiutissavat ilinniartunik kiffartuussivimmut: studieadm@uni.gl. Maalaarut tunngavilersussavat tunniutissallugulu kingusinnerpaamik aalajangiinerup nalunaarutigineqarneraniit sapaatit akunneri sisamat qaangiutsinnagit.