Inatsisartunut aamma kommunalbestyrelsinut qinersisitsisoqarnerani taasineq

Inatsisartunut kommunalbestyrelsinullu qinersisitsisoqarnerani taasineq
Inatsisartunut kommunalbestyrelsinullu qinersineq taasinikkut aalajangiiffigineqartarpoq. Taasineq ima ingerlanneqassaaq.

Illit nammineerlutit inimut qinersivimmut ornigutissaatit taasisitsinermillu aqutsisumut imaluunniit taassuma tamatumunnga pisinnaatitaanut saaffiginnillutit, taassuma illit atit qinersisinnaasut allattorsimaffianniittoq nalunaaqutsissavaa. Atit inuuillu, aamma pisariaqarpat najugaqarfik, apeqqutigineqarpata paasissutissiissutigissavatit. Ilanngullugu apeqqutigineqarpat kinaassutsit uppernarsarsinnaasariaqarpat. Taamaattumik kinaassutsimut uppernarsaammik atuuttumik, soorlu passi, biilinik ingerlatsisinnaanermut allagartaq assingisaaluunniit, nassarnissat isumassarsiatsialaassaaq. Tamatuma kingorna taasissutissaq atorneqanngitsoq ilinnut tunniunneqassaaq.

Taasissutissami, qinigassanngortittoq imaluunniit partii Inatsisartunut imaluunniit kommunalbestyrelsimut qinerneqartussatut kissaatigisat, krydsilissavat. Taasineq ineeqqami taasiviusumi pissaaq, tassanilu kisivit najuuttussaavutit. Taasivissaq immersoreerukku peqissavat, taamaalilluni illit qanoq taasisimanersutit takuneqarsinnaajunnaarlugu. Tamatuma kingorna taasissut peqitaq taasissutit karsiannut ikissavat.

Qinersineq nal. 9.00 ammartarpoq nal. 20.00 matusarluni.

Taasissutissaq nutaaq
Illit taasissutissat, kukkusumik immersorsimagukku imaluunniit arlaatigut atorsinnaajunnaarsinneqarsimappat, taarsertissinnaavat. Taasissut utertinneqartoq taasisitsinermik aqutsisumit immikkut paarineqassaaq. Taasissut, taasissutit karsiannut ikineqareersimasoq, taarsertissinnaanngilat.

Ikiuineq
Periuseq nassuiarneqartoq malillugu taasissut illit nammineerlutit immersorsinnaanngikkukku, taasisitsinermik aqutsisup ikiorsersinnaavaatit:

• Ineeqqamut taasivimmut pitsorlunneq imaluunniit assingusumik pissuteqartumik isersinnaanngikkuit, taasissutissat taasisitsinermik aqutsisup nakkutigisaanik ineeqqap silatinnguani immersorsinnaavat
• Tappiitsut isigiarsuttullu, inummik namminneq toqqakkaminnik ikiorneqarnissartik, piumasarisinnaavaat