Immersugassat digitaliusut

Immersugassaq digitaliusoq tassaavoq immersugassaq pappiaraq sullissivik.gl-imi digitalinngortitaq.

Kikkut sullissivik.gl-imi immersugassamik digitaliusumik sanatitsisinnaanersut
Naalakkersuisoqarfiit, aqutsisoqarfiit, kommunit aamma ingerlatsiviit tamarmik immersugassaatitik pappiaqqat sullissivik.gl-imi digitalinngortissinnaavaat – innuttaasunut aamma suliffeqarfiutilinnut.

Immersugassat digitaliusut atorlugit innuttaasup imaluunniit suliffeqarfiutillip pisortani isumagisassatik qassinngoraluarpalluunniit isumagisinnaavaat; nunaqarfimmiikkaluarunik illoqarfimmiikkaluarunilluunniit.

Innuttaasoq imaluunniit suliffeqarfiutilik MitID-ini atorlugu iserpat immersugassaq:

• Tunngaviusumik paasissutissanik imaqariissaaq (paasissutissat kukkunertallit ikinnerullutik)
• Toqqaannartumik immersorneqassaaq (atuaruminaatsunik assaannarmik allanneqarani)
• Oqartussanut isumannaatumik sullissivik.gl-ikkut nassiunneqassaaq

Immersugassami digitaliusumi aamma qulakkeerneqarsinnaavoq, immersugassap immersorneqareerluni nassiunneqannginnerani, immersuiffissat tamakkerlugit immersorneqarsimanissai. Taamaaliornikkut immersukkamik paasissutissanik amigartunik imaqartunik oqartussaasup tigusinissani pinngitsoortinneqarsinnaavaa, pissutigalugu immersuiffissat pinngitsoornani immersorneqartussanngortinneqarsinnaammata.

• Oqartussat imarisaateqaqqaassapput (Nutaamik imarisaliorlutik imaluunniit imarisaq nutarterlugu -imarisamut allannermi immersugassaq atorlugu)
• Oqartussat immersugassat digitaliusut immersorneqariarlutik nassiunneqartartut tigungaangamikkit suliarineqartarnissaat qularnaveeqqusissavaat
• Oqartussat mailiat nassiussuisarfissaq isumannaatsuussaaq (assersuutigalugu nanoq-mail. Emaili tigusisartussatut kissaatigisat isumannaatsuunngippat Vipre tunnelmaililiortitserusullutit IT-immikkoortortaqarfissi attavigissavat.)
• MitID-login atorlugu immersugassaq digitaliusoq sananeqassaaq(MitID imaluunniit MitID Erhverv)

Immersugassaq digitaliusoq sullissivik.gl-ikkut toqqaannartumik immersorneqariarluni nassiunneqarsimappat, oqartussaasup mailikkut tigussavaa

Immersugassaq digitaliusoq immersorneqariarluni nassiunneqarnikoq, oqartussaasup sulianik ingerlatsinermini qarasaasiakkut atortorissaarutaanut, imminut sullississut atassusikkatulli, toqqaannartumik attaveqarneq ajorpoq. Taamaattumik oqartussaasup immersugassaq digitaliusoq nassiunneqarsimasoq tiguguniuk, immersugassaq pappiaqqamut immersorneqarsimasutuulli suliarissavaat, soorlu immersugassaq anillatseriarlugu immersorneqarnikoq ornigullutik tunniunneqaraangatuulli.

Immersugassaq digitaliusoq Namminersorlutik Oqartussat qarasaasiakkut atortuannut ESDH-system-iannut F2-mut atassuserneqarsinnaavoq. Oqartussaasoq immersugassaq digitaliusumut sag-iliorsimappat, immersugassat digitalisut immersorneqariarlutik toqqaannartumik nassiunneqartut tamarmik tassunga sag-imut akt-inngorlutik pisassapput, pappilissat allat pisariaqartut ilaallutik.

Innuttaasoq aamma suliffeqarfiutilik imaaliorsinnaavoq:

1. MitID atorlugu isersinnaavoq immersugassarlu digitaliusoq immersoriarlugu, sullissivik.gl-ikkut toqqaannartumik oqartussaasumut susassaqartumut nassiussinnaavaa
2. Immersugassaq digitaliusoq sullissivik.gl-imi ammariarlugu immersorsinnaavaa, immersukkanilu pappiaranngorlugu anillatseriarlugu oqartussaasumut tunniukkiartorlugu (Innuttaasoq imaluunniit suliffeqarfiutilik MitID atorlugu isertariaqanngilaq)
3. Immersugassaq digitaliusoq pappiaranngorlugu anillatsissinnaavaa, immersoriarlugulu atsioqqaarlugu kommunimut ornigulluni tunniussinnaallugu (Innuttaasoq imaluunniit suliffeqarfiutilik MitID atorlugu isertariaqanngilaq)

Imarisaq tassaavoq qinnuteqaammi/noqqaassummi/nalunaarummi il.il qanoq suliap ingerlanneqartarnera aallartinneraniit naammassinissaata tungaanut innuttaasunut paasiuminartumik nassuiaanertalik, innuttaasup suliffeqarfiullilluunniip atuarsinnaasai.

Immersugassaq digitaliusoq tassaavoq imminut sullississut innuttaasup suliffeqarfiulitillilluunniit MitID-ini atorlugu iseriarluni atorsinnaasaa.

Oqartussaasut immersugassaartertik pappiaraq digitalinngortissinnaanngilaat sullissivik.gl-imi immersugassamut imarisaqanngippat.
Pissutigalugu pingaaruteqarami innuttaasup imaluunniit suliffeqarfiutillip immersugassamut digitaliusumut ingerlaqqinnginnerminni piumasaqaatit atuaqqaassagai.
Taamaattumik oqartussaasut digitaliusumik immersugassaliortitsinnginnerminni, piumasaqaatit, suliamut ingerlatseriaaseq, piffissaliussat assigisaalu pillugit imarisami ilitsersuusiorlutik pilersitseqqaassapput.

Oqartussat immersugassamik digitaliusumik nutaamik sanatitsiniarunik “Immersugassaq: Imarisaq imminut sullinnertalik” atorlugu:

1. Imarisamik nutaamik pilersitseqqaassapput (sullissivik.gl-imi imarisaateqariinngikkunik) imaluunniit
2. Imarisaq pioreersoq nutarteqqaassavaat (sullissivik.gl-imiittuuteqareerunik)

Oqartussaasup imarisaq piareerunikku, immersugassamik digitaliusumik sanatitsiniarlutik immikkut paasissutissanik allanik nassiussissapput.