Peqqinnissakkut sullinneqarneq pillugu naammagittaalliorneq

Peqqinnissakkut sullinneqarnermut pillugu linki aqqutigalugu naammagittaalliorsinnaavutit. Una "Peqqinnissakkut sullinneqarneq pillugu naammagittaalliorneq"-mik taaneqarpoq, illit katsorsartinnerit pineqarmat, inuiullu ataasiakkaat pissusilersuutigisimasaanut imaluunniit kiffartuusinermut tunnganngilaq. Katsorsartinninni inuk aalajangersimasoq ajortumik kingunerlutsitsisimappat naammagittaalliummi ilanngunneqarsinnaavoq, taamaalluni inunnut ataasiakkaanut tunngasumik naammagittaalliortoqassanersoq imaluunniit immikkut nakkutilliisoqartariaqalernersoq Nunatsinni Nakorsaaneqarfimmiit nalilerneqassammat.

Peqqinnissakkut sullinneqarneq pillugu naammagittaalliorneq, nunatsinni pisortaqarfiup peqqinnissaqarfiinni avataaniluunniit sulisunut tunngavoq, ilaatigut:

• Misissuinerit.
• Nappaammik suussusersineq aamma katsorsaaneq.
• Peqqinnissaqarfimmi sullinneqarnermi paaqqutarinninnerit aalajangersimasut.
• Nakorsiartunut ataasiakkaanut pinaveersaartitsineq peqqinnerulersitsinerlu.
• Katsorsartinnissamut paasissutissat akuersissutissallu.
• Peqqinnissaqarfimmi sulisut nipangiussisimasussaatitaanerat unioqqutinneqarpat.
• Nakorsap uppernarsaatai.
• Qulaani nassuiarneqartunut nalunaarsuisarneq.

Pisuni aalajangersimasuni peqqinnissakkut katsorsartinnermi aammalu sullinneqarnermi naammagittaalliutit akornanni qaleriittoqariataartarsinnaavoq. Taamatut pisoqassappat peqqinnissakkut sullinneqarneq pillugu naammagittaalliutigineqartoq, oqartussaaffimmi suliaqartartunut Nunatsinni Nakorsaaneqarfimmiit ingerlateqqinneqassaaq, tassanilu peqqinnissakkut sullinneqarneq pillugu naammagittaalliutigineqartoq peqqinnissaqarfiup aqutsisuisa qullersaannut suliassanngortinneqarluni ingerlateqqinneqartarpoq.

Peqqinnissakkut sullinneqarneq pillugu naammagittaalliutip imarisaa naapertorlugu aalajangiisoqartarpoq. Peqqinnissakkut sullinneqarneq pillugu naammagittaalliutinut taarsiissuteqartoqarneq ajorpoq. Taarsiissuteqartoqarnissaanik qinnuteqarsinnaavutit uani: Una tooruk. Taarsiissuteqartoqarnissaanut qinnuteqarniaruit katsorsartinnerit pillugu naammagittaalliuuteqarnissat pisariaqanngitsoq maluginiarneqassaaq, taamaammat naammagittaalliorniarnerlutit, taarsiissuteqartoqarnissaanut qinnuteqarniarnerlutit imaluunniit tamaasa suliassanngortinniarneritit nammineq aalajangiissavat.

Peqqinnissakkut katsorsartinnermut atatillugu naammagittaalliutigineqartoq tunngavigalugu, ataatsimut isigalugu suliatigut, pisortat peqqissaavianni avataaniluunniit peqqissaasut pillugit isornartorsiuinissamut tunngavissaqarnersoq, peqqinnissaqarfimmi napparsimasumik peqqinnissamut tunngatillugu katsorsaanermi, pitsaassuseq nalinginnaasumik akuerisaq malinneqarnersoq isummertoqassaaq.

Malugiuk:
Peqqinnissaqarfimmi napparsimasunut siunnersortit ullut tamaasa nal. 13:00-miit 15:00-mut attavigineqarsinnaapput, tassanilu suna pillugu naammagittaalliortoqassanersoq eqqartorneqassaaq kiisalu peqqinnissaqarfimmi periarfissat pisinnaatitaaffiillu pillugit paasissutissanik sukumiinerusunik pissarsisoqarluni.

Attavigineqarsinnaasut uani atuarsinnaavatit:
https://peqqik.gl/Emner/Patientinformation/Patentvejledning

Uani peqqinnissakkut sullinneqarneq pillugu naammagittaalliutigineqartut assersuutitut atuarsinnaavatit:
Peqqinnissamut tunngatillugu peqqinnissaqarfimmi, ass. napparsimasutut nakorsamit, peqqissaavimmi isumaginninnermi imaluunniit suliffeqarfiit peqqissutsimut tunngasunik ingerlataqartunit assigisaanilluunniit, suliatigut pitsaassuseq nalinginnaasumit akuerisaq tamakkiisumik malinneqarsimanngippat, taava una qupperneq aqqutigalugu naammagittaalliuteqarsinnaavutit.

Malugiuk: Peqqinnissakkut sullinneqarneq pillugu naammagittaalliutit assersuutitut ukuusinnaapput:.
Peqqinnissakkut sullinneqarneq pillugu naammagittaalliutitut assersuutit:
” Qaqqami pisuttuarlunga orlugama ujararujussuarmut najungasukka annersippakka, tilluusarpunga anniarujussuarlungalu, kisanni peqqinnissaqarfimmut attaveqarama paasitinneqarpunga misissortinnissara pisariaqanngitsoq. Arlaleriarlunga napparsimmavimmutmisilillugu sianeqattaaraluarpunga, sapaatip akunnera qaangiummat peqqissaasumut nakorsiarpunga tassanilu paasitinneqarpunga najungasora ataaseq napisimasoq.”

”Seeqqukkut suliaritinnera pillugu naammagittaalliorpunga. Suliaritinnera naammaginanngilaq, anniartangaarama allaat nikorfasinnaanngilanga.
Suliaritinninniit qaammatit pingasunngormata anniangaarama nikorfasinnaannginnama napparsimmavimmut sianerpunga. Nakorsap oqaluussama seeqqora misissorumanngilaa.”

”Peqqinnissaqarfimmi katsorsartinnera pillugu naammagittaalliorpunga. Eqqortumik katsorsarneqanngilanga kukkusumillu nakorsaaserneqarlunga. ”

”Panimma kigutai narlorissarneqarsinnaajunnaarneri pillugu naammagittaalliorpunga. Paniga kigutik narlorissaasuanit misissorneqarpoq, takkutinngitsoornittalu kingorna kigutai narlorissarneqarsinnaajunnaarput, uffa panima kigutini narlorinngimmata qilanaartorujussuugaluartoq.”

Malugiuk - Peqqinnissakkut sullinneqarneq pillugu naammagittaalliorneq aamma Kiffartuusineq pillugu naammagittaalliorneq assigiinngitsuummata, oqartussanit assigiinngitsunit suliarineqartaramik, taamaammat naammagittaalliornermut immersugassat assigiinngitsut marluupput. Naammagittaalliutit tamarmik Nunatsinni Nakorsaaneqarfimmut ingerlateqqinneqassapput taassumalu kingorna suliaq oqartussanut eqqortunut suliarinnittussanut ingerlatinneqassallutik.

Assersuutit ataaniittut peqqinnissakkut katsorsartinnermut atatillugu naammagittaalliuutaanngitsut takuneqarsinnaapput:
Kiffartuusineq pillugu naammagittaalliornermut assersuutit:

”Immikkoortortaqarfimmi sulisumiit naammaginanngitsumik ikiorneqarpunga, nerisassaqartinneqanngilanga aali piffissaq tassani innangaannartuullunga. ”

”Ippassaq unitsinneqarpunga. Suliaritinnginninni uffaqquneqarpunga, uffariarama uffarfik ipertooq naammattoorpara. Sulisunut saaffiginnippunga. Sulisunit uffarfik eqqiarneqarusunngilaq uffa atortariaqariga.”

Sullissineq pillugu naammagittaalliuutit suli paasisaqarfiginerorusukkukkit linki una tooruk Kiffartuusineq pillugu naammagittaalliorneq.


Nalorniguit Nunatsinni Nakorsaaneqarfimmit ilitsersorneqassaatit, attavissat ataani immikkoortortami "Peqqinnissakkut sullinneqarneq pillugu naammagittaalliummik nassiussineq"-mi ersipput.

Peqqinnissakkut sullinneqarneq pillugu naammagittaalliummik imatut nassiussisinnaavutit:

1. Imminut sullinneq aqqutigalugu MitID atorlugu isissaatit "Ugguuna napparsimasutut naammagittaalliut nassiuguk" nittartakkami tassani qulaata tungaaniittoq ammassavat, taavalu immersussavat tassanngaanniillu nassiullugu, imaluunniit
2. Naammagittaalliut anillatseriarlugu immersorsinnaavat, e-mailikkut nassiussinnaavat uunga nun@nanoq.gl imaluunniit allakkatigut Nunatsinni Nakorsaaneqarfik, postboks 120, 3900 Nuuk

Nassiunnissaanut ikiugassaaguit uani ikiortissarsisinnaavutit:

• Najukkanni kommunimi Innuttaasunut sullissivik (teknikkikkut ikiorneqarneq) imaluunniit
• Nunatsinni Nakorsaaneqarfimmut attaveqarlutit uunga nun@nanoq.gl imaluunniit oqarasuaammut uunga 34 51 92

Malugiuk:
Inuk alla sinnerlugu naammagittaalliorniaruit piginnaatitsissummik peqaqqaassaatit.

Tamanna pillugu ataani paasisaqarnerusinnaavutit.

Piginnaatitsissut - Qitornat napparsimasutut sinnerlugu naammagittaalliuteqassaguit
Angajoqqaatut imaluunniit qitornamut akisussaatitaasutut, meeraq 18 ataallugit ukioqarpat, piginnaatitsissummik qinnuteqanngikkaluarlutit qitornat sinnerlugu naammagittaalliorsinnaavutit.

Inuk inersimasutut oqartussaasuseqartoq sinnerlugu naammagittaalliussaguit:
Inuk alla sinnerlugu naammagittaalliuteqassaguit, Nunatsinni Nakorsaaneqarfimmut naammagittaalliortinnak, pineqartoq piginnaatitsissummik allakkamik ilinnut tunniusseqqaassaaq. Tassa inuk qanigisarigaluaraanniluunniit assersuutigalugu angajoqqaaq, qitornarisaq inersimasoq aapparisarluunniit aamma pineqarput.
Peqqinnissaqarfimmi sulisut sulianullu sullissisut paasissutissanut tusarliunneqarsinnaanngitsunut, inuttullu atukkanut sulianut tunngatillugu aatsaat ingerlatitseqqiisinnaapput piginnaatitsissut pigineqarpat.

Immersugassaq piginnaatitsissut una toorlugu aasinnaavat.

Peqqinnissaqarfimmi peqqinnissakkut sullinneqarneq pillugu naammagittaalliutip suliarineqarnera
Nunatsinni Nakorsaaneqarfimmit naammagittaalliuut tiguneqarpat tiguneqarsimaneranik uppernasaammik allagarsissaatit.
Nunatsinni Nakorsaaneqarfimmit suliaq nalilersorneqalerpat suliap qanoq ingerlanera kiisalu qanoq sivisutigisumik suliarineqassanersoq pillugit paasissutissanik allagarsissaatit.

Suliaq ilinnut tunngasoq Nunatsinni Nakorsaaneqarfimmiit oqartussanut allanut suleqatigineqartunut, suliarlu sumut tunnganersoq apeqqutaalluni, sullissisorineqartussamut ingerlateqqinneqassaaq:

Peqqinnissakkut sullinneqarneq pillugu naammagittaalliutit Styrelsen for patientklager-imut ingerlateqqinneqartarput.

Styrelsen for Patientklager-imiit naammagittaalliutit tiguneqartut misissorneqartarput. Styrelsen for Patientklager-imiit naammagittaalliutigisat malillugu ilaatigut peqqinnissakkut sullissisunut naammagittaalliutigineqartunut paasissutissanik pissarsiniartoqartarpoq.
Naammagittaalliutit suliarineqassappat, Nunatsinni Nakorsaaneqarfimmit aamma Styrelsen for Patientklager-imit piffissami suliarineqarnerata nalaani nassiunneqartut, suliami paasissutissat pillugit saaffiginnissutit, naammagittaalliutigineqartunut allanullu uppernarsaassutinut tunngasut akisassavatit.

Saaffiginnissutigineqartut akineqarneq ajorpata suliaq amigartumik tunngaveqarluni suliarineqassaaq. Tamanna naammagittaalliutigineqartup itigartissutigineqarsinnaaneranik kiisalu suliap ingerlanerata sivitsorsinnaaneranik kinguneqarsinnaavoq.

Peqqinnissakkut sullinneqarneq pillugu naammagittaalliutigisat Styrelsen for Patientklager-imit suliarineqarnera qaammatit pingasut pallillugit sivisussuseqarsinnaanissaa naatsorsuutigissavat.

Naammagittaalliutigineqartoq sapinngisamik suliarilluagaassappat pisoq pereerneraniit piaarnerpaamik naammagittaalliuteqarnissat pingaaruteqarpoq.
Piffissaq sivisooq ingerlareertoq naammagittaalliuteqassaguit, peqqinnissaqarfimmi sullissisup suliaq qanoq ingerlasimanersoq eqqaamajuminaatsissinnaavaa, imaluunniit allami sulilereersimasinnaavoq. Naammagittaalliutinik suliaqarnermut ajoqutaasinnaalluni.

Katsorsartinnerup pereerneraniit kingusinnerpaamik ukiut tallimat qaangiutsinnagit naammagittaalliuteqareersimassaatit.
Peqqinnissakkut sullinneqarneq pillugu naammagittaalliorniaruit, pisoq pereerneraniit kingusinnerpaamik ukiut marluk qaangiutsinnagit naammagittaalliuteqareersimassaatit.

Inuk kinaluunniit peqqinnissaqarfimmi sullinneqarneq pillugu naammagittaalliuteqartoq, peqqinnissaqarfimmit oqaloqatigineqarnissaanik neqeroorfigineqassaaq. Nakorsiartup sullinneqarnera pillugu nassuiaasinnaanissaanut ilisimatitsissuteqarsinnaanissaalu siunertavoq. Oqaloqatiginninnerup kingorna naammagittaalliortup suliap ingerlariaqqinnissaanut qanoq isummernersoq paasineqartarpoq. Eqqaamajuk naammagittaalliornermi immersugassami oqaloqatiginnikkusullutit kissaateqarnerit krydsilissagakku.
Oqaloqateqarnissaq isummerfigisimanngikkukku Nunatsinni Nakorsaaneqarfimmit oqarasuaatikkut attavigineqassaatit.

Oqaloqateqarnermi susoqartarpa?
Oqaloqatiginninnissap qanoq ingerlanneqarnissaanut immikkut malittarisassaqanngilaq, peqqissaaviillu tamarmik assigiinngitsunik periuseqarput. Peqqissaavimmi oqaloqatiginnittoqassaaq. Taamaammat oqaloqatiginninnermi ilaassaguit peqqissaavimmi qanoq suleriuseqassanersut paasissallugu pingaaruteqarpoq.
Oqaloqatiginninnermi apeqqutitit akineqassapput aamma ilaatigut sullissinerup misissuinerullu qanoq ingerlasimaneri nassuiarneqassapput.

Oqaloqatigiinnermi naammagittaalliuteqartoq sullinneqarneq pillugu naammaginartumik sullinneqarsimanni nalilersinnaavaa. Suliaq naammagittaalliuuteqarnermut tunngasoq taamaalilluni naammassisinnaavoq taassumallu kingorna nanginneqassanngilaq.

Naammagittaalliuteqartoq suliap nanginneqarnissaanik aalajangersinnaavoq, taassumallu kingorna Styrelsen for Patientklager-imit suliaq aallartinneqassaaq. Naammagittaalliut pillugu suliaq nanginneqassanersoq naammagittaalliuteqartumit aalajangerneqassaaq.

Peqqinnissaqarfimmit attavigineqaruit kimut saaffiginnitassanerlutit paasisimanngikkukku oqarfigineqassaatit.

Malugiuk:
Peqqinnissaqarfimmit oqaloqateqarnissat kissaatigigukku imaluunniit kissaatiginngikkukku immersuiffissami krydsilerneqassaaq. Oqaloqateqarnissamik kissaateqaruit peqqinnissaqarfimmit sapaatip akunneri sisamat iluani attavigineqassaatit.

Suliaq peqqinnissakkut sullinneqarneq pillugu naammagittaalliutigineqartoq naammassinnginnerani paasissutissanik allanik atorsinnaasunik ilassuteqarnissat periarfissaraat.

Suliamut atatillugu paasissutissanik nutaanik peqaruit Nunatsinni Nakorsaaneqarfimmut e-mail aqqutigalugu uunga nassiussisinnaavutit: nun@nanoq.gl imaluunniit Nunatsinni Nakorsaaneqarfiup oqarasuaataanut uunga, 34 51 92, sianersinnaavutit. Ammasarfiit ataasinngorneq – tallimanngorneq nal. 10:00 – 14:00.