Najukkani aatsitassanut tunngasunik suliaqarnissamut akuersissummik qinnuteqarit

Kalaallit Nunaanni ujaqqanik pinnersaasiassanik aatsitassanillu allanik piiaanermik aallaavilimmik, najukkami annikinnerusunik inuussutissarsiornermi suliaqarnernik ineriartortitsinerup tapersersornissaa Inatsisartut kissaatigaat. Taamaattumik annikinnerusumik aatsitassarsiorluni misissuinermik aamma piiaanermik ingerlataqarnissamut maleruagassat sukumiisut aalajangersarneqarput.

Najukkani aatsitassanut tunngasunik suliaqarnerit inunnut Kalaallit Nunaannut aalajangersimasumik atassuteqartunut sammitinneqarput.

Kalaallit Nunaanni aalajangersimasumik najugaqartut tamarmik* akuersissummik peqaratik:

• Aatsitassanik kaanngareersimasunik katersisinnaapput aammalu atortut tigummiaannartakkat atorlugit aatsitassanik piiaasinnaallutik. Tamanna sumiiffimmut kisermaassisussaatitaalersitsinngilaq

o Taamaattoq sumiiffinnut aatsitassanik piiaanissamut akuersissummi, aatsitassarsiorluni misissuinissamut akuersissummi ulloq 1. oktober 2024 tikitsinnagu tunniunneqarsimasumi imaluunniit atortussanut akuersissuteqarnermi (ujaqqerivik il.il.) pineqartunut ilaasunut, tamanna atuutinngilaq

• Avammut annissinissamut akuersissuteqarfigineqarani aatsitassanik piiaasinnaapput
• Aatsitassat aamma nunap sannaa takutinniarlugit ilitsersuisoqarluni angalaartitsinernik ingerlatsisinnaapput

*Kalaallit Nunaanni aalajangersimasumik najugaqartoq ukiuni 5-inik kingullerni aalajangersimasumik najugaqarsimavoq aammalu tamakkiisumik akileraartussaatitaasimalluni.

Najukkani aatsitassanut tunngasunik suliaqarnissamut akuersissut taamaallaat ingerlatseqatigiiffinnut tunniunneqarsinnaavoq, tassani ingerlatseqatigiiffimmi aalajangiisuusumik sunniuteqarneq inummit aalajangersimasumik najugaqartumit ingerlanneqarluni. Ingerlatseqatigiiffik Kalaallit Nunaanni angerlarsimaffeqassaaq aammalu tassaasinnaalluni aktiaatileqatigiiffik, piginneqatigiiffik imaluunniit inuup ataatsimi suliffeqarfia.

Najukkani aatsitassanut tunngasunik suliaqarnissanut akuersissut sumiiffimmi erseqqinnerusumik killissalersorneqartumi (1 km2) aatsitassarsiorluni misissuinissamut piiaanissamullu kisermaassisussaatitaaffiliivoq. Akuersissut aamma aatsitassanik annissinissamut pisinnaatitaaffiliivoq.

Inummut ingerlatseqatigiiffimmi qinnuteqartumi aalajangiisuusumik sunniutilimmut piumasaqaatit:

• Namminersorsinnaatitaassaaq
• Kalaallit Nunaanni najugaqassaaq
• Ukiut 5-it kingulliit Kalaallit Nunaanni inuit nalunaarsorsimaffianni nalunaarsorsimasumik najugaqarsimassaaq
• Ukiut 5-it kingulliit Kalaallit Nunaanni tamakkiisumik akileraartussaatitaasimassaaq
• Akuersissut malillugu ingerlatassat suliarinissaannut aammalu akuersissutip ataani taannalu malillugu pisussaaffiit naammassinissaannut pisariaqartunik suliamut piginnaasaqassaaq aningaasaqarnikkullu pisinnaasaqassalluni

Akuersissut atuuppoq:

• Ukiuni 5-ini sivitsorneqarnissaa periarfissaqarluni
• Sumiiffimmut 1 km2-isut annertussusilimmut
• Atortunit tigummiaannartakkanit allaanerusut atorlugit piiaasoqartussaappat, tamatumani piiaanissamut pilersaaruteqarnissaq matusinissamullu pilersaaruteqarnissaq piumasaqaataavoq. Pilersaarutit Naalakkersuisunit akuerineqarsimassapput.

Qinnuteqarneq
Najukkani aatsitassanut tunngasunik suliaqarnissanut akuersissummik qinnuteqarniaruit, illit:

• Qinnuteqarnermi immersugassaq attuumassuteqartoq immersussavat
• Qinnuteqarnermut tunniussinermullu akiliut akilissavat. Akiliutip annertussutaa aamma kontonornu qinnuteqarnermi immersugassami allassimavoq

Qinnuteqaammut ilanngullugu uppernarsaat ilanngutissavat, illit:

• ukiuni siuliini 5-ini Kalaallit Nunaanni aalajangersimasumik najugaqarsimanernut, najugarisamut uppernarsaatitut ilusilimmik
• ukiuni siuliini 5-ini Kalaallit Nunaanni akileraartussaatitaasimallutit, Akileraartarnermut Aqutsisoqarfimmiit uppernarsaatitut ilusilimmik
• qinnuteqarnermut akiliut akilersimallugu

Qinnuteqarnermi immersugassaq

Najukkani aatsitassanut tunngasunik suliaqarn issamut akuersissummik qinnuteqaat

Aatsitassanut tunngasunik suliaqarnissamut akuersissummik qinnuteqaammut ilanngussaq 1
 
Atortunit tigummiaannartakkanit allaanerusut atorlugit piiaaneq ingerlanneqartussaappat aatsaat ilanngussaq 1 immersorneqassaaq. Taamaassimappat piiaanissamut pilersaarut aamma matusinissamut pilersaarut suliarineqassapput. Pilersaarutit ingerlatassat aallartinnginneranni akuerineqarsimassapput.

Najukkani aatsitassanut tunngasunik suliaqarnissamut akuersissutip sivitsorneqarnissaanik qinnuteqaat
 
Sapinngisamik qinnuteqarnermi immersugassaq attuumassuteqartoq elektroniskimik immersussavat.

Immikkut ittumik akuerineqarnissamik qinnuteqarsinnaavutit
Najukkani aatsitassanut tunngasunik suliaqarnissanut akuersissummik qinnuteqarusukkuit aammalu minnerpaamik ukiuni 5-ini kingullerni Kalaallit Nunaanni najugaqarsimanngikkuit akileraartussaatitaasimanngikkuillu, assersuutigalugu ilinniarnerni Kalaallit Nunaat qimakkallarsimanera pissutigalugu, immikkut ittumik akuerineqarnissamik qinnuteqarsinnaavutit. Immikkut ittumik akuersissuteqartarneq pillugu annertunerusut qinnuteqarnermi immersugassami takukkit.

Ukiumoortumik nalunaarusiaq
Aatsitassarsiorluni misissuinermi piiaanermilu suliassat suliarineqarsimasut pillugit ukiumoortumik nalunaarusiamik Aatsitassanut Ikummatissanullu Aqutsisoqarfimmut nassiussissaatit.

Najukkani aatsitassanut tunngasunik suliaqarnissanut akuersissummik peqaruit, ukiumoortumik nalunaarusiamik nassiussisassaatit, tassani nassuiassavat akuersissuterni ingerlatassat suut suliarisimanerlugit, aammalu nunap sannaa pillugu nutaanik ilisimasaqalersimanerlutit. Aamma aatsitassat piiarneqartut annertussusaat pitsaassusaallu, suliareqqiisimaguit, tunisat avammullu anninneqartut allassavatit.

Ukiumoortumik nalunaarusiamut immersugassaq ammarniarlugu una tooruk

Najukkani aatsitassanut tunngasunik suliaqarnissamik qinnuteqaat, qinnuteqarnermut akiliummi 1.000 koruuninik akeqarpoq.

Najukkani aatsitassanut tunngasunik suliaqarnissaq taamaallaat qinnutigisinnaavat qinnuteqaatit nassiullugu uunga mlsa@nanoq.gl

Najukkani aatsitassanut tunngasunik suliaqarnissaq taamaallaat qinnutigisinnaavat qinnuteqaatit nassiullugu uunga mlsa@nanoq.gl

Qinnuteqaat kiisalu ilanngussat sapinngisamik e-mail-ikkut Aatsitassanut Ikummatissanullu Aqutsisoqarfimmut nassiunneqassapput.

Aatsitassanut Ikummatissanullu Aqutsisoqarfiup qinnuteqaatit suliarissavaa ingerlaavartumillu ilisimatittassallutit. Naatsorsuutigineqarpoq qinnuteqaat qaammatit 3-t iluanni suliarineqarsinnaasoq.

Kalaallit Nunaanni aalajangersimasumik najugaqarunnaarsimaguit imaluunniit Kalaallit Nunaannut aalajangersimasumik akileraartussaatitaajunnaarsimaguit sapinngisamik piaarnerpaamik Aatsitassanut Ikummatissanullu Aqutsisoqarfik attaveqarfigissavat.

Ukioq tamaat qinnuteqarsinnaavutit.

Naalakkersuisut aalajangiineri allaffissornikkut naammagittaalliuutigineqarsinnaanngillat. Aalajangiineq nammagittaalliuutigisinnaatitaanerlugu nalorniguit, Inuussutissarsiornermut, Niuernermut, Aatsitassanut, Inatsit Atuutsinneqarnerannut Naligiissitaanermullu Naalakkersuisoqarfik attaveqarfigisinnaavat uani asn@nanoq.gl.