Aatsitassanik avammut annissuineq

Kalaallit Nunaanniit aatsitassanik annissinissaq kissaatigigukku, tamatumunnga maleruagassat eqqumaffigissavatit.

Aatsitassat tassaapput aatsitassat ikummatissiassaanngitsut (uulia aamma naturgassi). Aatsitassani ilaatinneqarput ujaqqat, saffiugassat allallu aatsitassatut ilusillit, ikummatissiassaanngitsut, tamarmik. Inuit ikummatissiassanik imaluunniit uranitalinnik katersinissaat, piiaanissaat imaluunniit annissinissaat akuerisaanngilaq.

Tamanna aalajangersimasumik najugalinnut aamma aalajangersimasumik najugaqartuunngitsunut atuuppoq. Tamatuma saniatigut aalajangersimasumik najugaqartuunngitsunut annertunerusunik killilersuisoqarpoq. Itisiliinissamut inussiarnersumik matuma kingulianiittut takukkit.

Imaattoqartillugu avammut annissinissamut akuersissut pisariaqartussaanngilaq:

• Aatsitassat Kalaallit Nunaanni, assersuutigalugu pisiniarfimmi, ujaqqanik pinnersaasiassanik eqqumiitsuliortumit imaluunniit najukkami aatsitassanut tunngasunik suliaqarnissamut akuersissummik peqartumit, pisiarisimagukkit, aammalu assersuutigalugu akuersissummik allagartamik imaluunniit pisinermut uppernarsaammik pisineq uppernarsarsinnaallugu.
• Aatsitassat ilisimatusarnissaq siunertaralugu katersorneqarsimappata imaluunniit piiarneqarsimappata. Taamaattoq eqqumaffigissavat pisuni aalajangersimasuni ilisimatusarnissaq siunertaralugu aatsitassanik katersinissamut imaluunniit piiaanissamut akuersissummik peqarnissaq piumasaqaataasarmat. Nalorniguit Aatsitassanut Ikummatissanullu Aqutsisoqarfik attaveqarfigiuk.

Suussutsit pingasut makkua akornanni immikkoortitsisoqassaaq:

A. Aalajangersimasumik najugaqartut
B. Aalajangersimasumik najugaqartuunngitsut qaammatini pingasuni siuliini Kalaallit Nunaanniissimasut
C. Aalajangersimasumik najugaqartuunngitsut qaammatinit pingasunit siuliinit sivikinnerusumik Kalaallit Nunaanniissimasut

A. Aalajangersimasumik najugaqartut
Kalaallit Nunaanni aalajangersimasumik najugaqartuuguit, Kalaallillu Nunaannut tamakkiisumik akileraartussaatitaaguit, avammut annissinissamut akuersissut pisariaqartinngilat. Aatsitassat nalituut imaluunniit nalitunnginnerusut pineqarnersut apeqqutaatinnagu tamanna atuuppoq. Uppernarsaatitut oqaluttuarisaanermi najugaqarnermut uppernarsaat atussavat.
Aalajangersimasumik najugaqartoq paasineqassaaq tassaasoq inuk ukiuni 5-ini siuliini Kalaallit Nunaanni aalajangersimasumik najugaqarsimasoq aammalu Kalaallit Nunaannut tamakkiisumik akileraartussaatitaasimasoq. Inuup Kalaallit Nunaannut atassuteqarnera aallaavigalugu tamanna naleqquttuut nalilerneqarpat, aammalu inuk aammattaaq ilinniarnerminik assigisaanilluunniit pissuteqartumik Kalaallit Nunaata avataaniissimappat, qinnuteqarneq malillugu ukiunut tallimanut piumasaqaatip saneqqunneqarnissaa immikkut ittumik akuerineqarsinnaavoq.

B. Aalajangersimasumik najugaqartuunngitsut qaammatini pingasuni siuliini Kalaallit Nunaanniissimasut
Qaammatisiutit malillugit ukiumi ataatsimi aatsitassat kaanngareersimasut 1 kg angullugu annertussusillit inuussutissarsiutiginagu katersorsinnaavatit , taamaattoq aatsitassat makkua katersorsinnaanngilatit:

• Safirit
• Rubinit
• Grønlandit
• Tugtupit
• Nuummit
• Ukkusissaq
• Månesten
• Turmalin
• Amazonit
• Sodalit

Avammut annissinissamut akuersissummik peqarnaq aatsitassat katersukkatit ukiumut 1 kg angullugu annertussusillit avammut annissinnaavatit. Killissaliussat qaangerlugit (ukiumut 1 kg) aatsitassanik annissiniaruit, aatsitassat aalajangersimasumik najugaqartumit pisiarisimallugit uppernarsarsinnaasussaavat.

C. Aalajangersimasumik najugaqartuunngitsut qaammatinit pingasunit siuliinit sivikinnerusumik Kalaallit Nunaanniissimasut
Tamanna ilitsersuisoqarluni angalaartitsinermi, aalajangersimasumik najugaqartumit aaqqissuunneqartumi, pisimanngippat, aatsitassanik katersisinnaanngilatit imaluunniit piiaasinnaanngilatit. Aatsitassanik annissiniaruit, avammut annissinissamik akuersissummik peqassaatit imaluunniit aatsitassat aalajangersimasumik najugaqartumit pisiarisimallugit uppernarsarsinnaassallugu.

Nassiussassanut avammut annikkusutarnut ataasiakkaanut tamaginnut avammut annissinissamut akuersissummik qinnuteqassaatit. Aatsitassat suut avammut annikkusunnerlugit, qinnuteqaammi erseqqinnerusumik nassuiassavat.

Avammut annissinissamut akuersissummut qinnuteqarnermi immersugassaq aaniarlugu una tooruk.

Qinnuteqaat mail-ikkut Aatsitassanut Ikummatissanullu Aqutsisoqarfimmut uunga mlsa@nanoq.gl nassiutissavat.

Aatsitassanut Ikummatissanullu Aqutsisoqarfiup qinnuteqaat tiguppagu, Aatsitassanut Ikummatissanullu Aqutsisoqarfiup qinnuteqaat suliarissavaa. Tamatuma kingorna Aatsitassanut Ikummatissanullu Aqutsisoqarfiup avammut annissinissamut akuersissut ilinnut tunniutissavaa.

Akuersissut aatsitassanut akuersissummi allattorsimasunut, aammalu nassiussinermut ataasiinnarmut, taamaallaat atuuppoq. Tamanna isumaqarpoq, aatsitassanik allanik avammut annissinissaq imaluunniit nutaamik nassiussinissaq kissaatigigukku, avammut annissinissamut akuersissummik nutaamik qinnuteqarnissat eqqaamassagit.

Aatsitassat Kalaallit Nunaanniit avammut annikkukkit, killeqarfimmi nakkutilliisut avammut annissinissamut akuerineqarsimasutit takunissaanut periarfissaqarnissaat, illit isumagisussaavat. Killeqarfimmi nakkutilliisunut avammut annissinissamut akuersissutip takutinneratigut taamaaliussaatit. Tamanna avammut annissinerup ilusaa apeqqutaalluni assigiinngitsutigut pisinnaavoq:

• Ujaqqat imaluunniit aatsitassat containerimi avammut anninnissaat toqqarsimagukku, nassiussarnut avammut annissinissamut akuersissutip assilinera ilanngussinnaavat
• Ujaqqat imaluunniit aatsitassat poortukkatut imaluunniit allakkatigut nassiunnissaat toqqarsimagukku, nassiussarnut avammut annissinissamut akuersissutip assilinera ilanngussinnaavat
• Ujaqqat imaluunniit aatsitassat nammineerlutit anninnissaat toqqarsimagukku, nammineerlutit avammut annissinissamut akuersissut killeqarfimmi nakkutilliisunut takutissinnaavat
• Inuup allap illit sinnerlutit ujaqqat imaluunniit aatsitassat annisissagai toqqarsimagukku, inuup pineqartup avammut annissinissamut ilinnut akuersissut aammalu ilinniit piginnaatitsissut killeqarfimmi nakkutilliisunut takutissavaa

Aalajangersimasumik najugaqartuuguit, oqaluttuarisaanermi najugaqarsimanermut uppernarsaat, avammut annisseqqusaanernut uppernarsaatitut atussavat.

Aatsitassanut Ikummatissanullu Aqutsisoqarfiup aalajangiineri Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmut naammagittaalliuutigineqarsinnaapput. Naammagittaalliuut allaganngorneqassaaq aammalu Aatsitassanut Ikummatissanullu Aqutsisoqarfimmut nassiunneqassalluni (mlsa@nanoq.gl). Naammagittaalliornissamut killigitinneqarpoq sapaatit akunneri 6-it.