Takornarialerinissamut licensimik qinnuteqarit

Takornarialerisut Kalaallit Nunaanni misigisassanik takornarissanut neqerooruteqartut tamarmik, tulliuttunillu neqerooruteqartartut

• Unnuinertaqanngitsumik ulluinnarlugu angalanissamik aamma,
• Ullut arlerlugit angalanissamik

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfimmit takornarialerinissamut licenseqassapput.

Qinnuteqarfissap quppernermi uaniittup immersorneratigut, takornarialerinissamut licensimik qinnuteqarneq pissaaq.

Takornarialerisup niuernermik tunngavilimmik takornarissanut misigisassanik unioqqutitsinngitsumik neqerooruteqarsinnaaneranut, takornarialerinissamut licensi uppernarsaataavoq.

Takornarialerinissamut licensimik pissarsissagaanni, suliffeqarfiup qinnuteqarfissamik immersuineratigut qinnuteqaammik nassutsissaaq

Suliffeqarfik kisimiillutit ingerlakkukku takornarialerinissamut licensimik qinnuteqarsinnaavutit aatsaat:

• Kalaallit Nunaanni inuit allattorsimaffianni nalunaarsugaasimaguit
• Kalaallit Nunaanni tamakkiisumik akileraartussaatitaaguit
• Nammineq pisuussutinnik tamakkiisumik atuisinnaatitaaguit, akiliisinnaajunnaaqqanngikkuillu

Suliffeqarfittut takornarialerinissamut licensimik qinnuteqarsinnaavutit aatsaat:

• Ingerlatseqatigiiffiit Kalaallit Nunaanni angerlarsimaffeqarpat
• Aningaasat minnerpaamik 2/3-ii Kalaallit Nunaanni inuit allattorsimaffianni nalunaarsugaasimasumit imaluunniit Kalaallit Nunaanni akileraartussaatitaasumit toqqaannartumik imaluunniit toqqaannanngitsumik pigineqarpata
• Suliffeqarfimmi taasisinnaatitaasut minnerpaamik 2/3-ii Kalaallit Nunaanni inuit allattorsimaffianni nalunaarsugaappata, akileraartussaatitaappatalu
• Ingerlatseqatigiiffimmi inuit peqataasut minnerpaamik 2-3-ii Kalaallit Nunaanni inuit allattorsimaffianni nalunaarsugaappata, akileraartussaatitaappatalu

Suliffeqarfimmik kisimiillutit ingerlatsiguit imaluunniit suliffeqarfiuguit takornarialerisoq piumasaqaataavoq:

• Ingerlatseqatigiiffinnut allaganngorlugu isumannaallisaanermut pilersaaruteqarnissat
• Inuussutissarsiornermi akisussaatut sillimmasersimanissat imaluunniit allatut qularnaveeqqusersimanissat.

Malugiuk:

Suliffeqarfiutinni kaaviiaartittakkatit tamarmiusut ukiumut 50.000 koruunit sinneqqanngippagit, takornarialerinissamut licenseqarnissamik piumasaqaat atuutissanngilaq.

Takornarialerinissamut licensimik qinnuteqarneq, tunineqarnerluunniit akeqanngilaq.

Takornarialerinissamut licensimik pissarsissagaanni qinnuteqarfissaq immersorsimassaaq.

Takornarialerinissamut licensimik qinnuteqarniaruit, nammineq sullinnissamut uani quppernermi siullermi tuugassaq sungaartoq ”Takornarialerinissamut licensimik qinnuteqarit” aqqutigalugu qinnuteqarsinnaavutit.
Qinnuteqaammut tulliuttut ilanngunneqassapput:

•Isumannaallisaanermut pilersaarut

• Inuussutissarsiornermi akisussaatut sillimmasersimanermut uppernarsaa

Malugalugu:
MitID atorlugu iseruit aatsaat qinnuteqaatit digitalikkut nassiussinnaagakku.

MitID-qanngikkuit qinnuteqarfissaq aariarlugu immersorneqarsinnaavoq, qinnuteqaallu immersorsimasoq pisariaqartunik uppernarsaatinik ilalik isiin@nanoq.gl-imut nassiullugu

Inuussutissarsiornermut, Niuernermut, Aatsitassanut, Inatsisit Atuutsinneqarnerannut Naligiissitaanermullu Naalakkersuisoqarfiup qinnuteqaatit isiin@nanoq.gl aqqutigalugu tiguguniuk, Inuussutissarsiutinut immikkoortortaqarfimmi sullissisussamut ingerlateqqinneqassaaq.

Qinnuteqaat misissorneqarlunilu suliarineqassaaq. Naalakkersuisoqarfik piffissat ilaanni piffissami sivisunerusumi sulianik suliaqarsinnaasarpoq, taamaattumillu takornarialerinissamut licensimik sioqqutsisumik qinnuteqartoqassasoq innersuussutigineqarluni.

Akissut, akuersissullu qinnuteqaammi mailimut paasissutissiissutigineqartumut nassiunneqassapput.

Suliffeqarfimmi allannguuteqarpat, tamanna Naalakkersuisoqarfimmut piaarnerpaamik ilisimatitsissutigineqassaaq.

Allannguutit nalunaarutigineqartussat tassaapput:

• CVR allanngorpat
• Piginnittuunermut tunngasut allanngorpata
• Sullissinerit allanngorpata
• Isumannaallisaanermi pilersaarutit allanngorpata
• Sillimmasiissutit allanngorpata
• Aningaasanut tunngasut annertuumik allanngorpara

Taakkunani ataaseq, arlallilluunniit allanngorpata Naalakkersuisoqarfik ilisimatissallugu pisussaaffigaat.

Malugiuk:
Taakkunani ataaseq, arlallilluunniit allanngorpata Naalakkersuisoqarfik uunga attavigineqassaaq isiin@nanoq.gl

Ukioq kaajallallugu qinnuteqartoqarsinnaavoq.

Takornarialerinissamut licensimik qinnuteqaatinnut atatillugu Inuussutissarsiutinut immikkoortortap aalajangiinera maalaarutigineqarsinnaavoq.

Maalaarutit mailikkut uunga nassiunneqassapput isiin@nanoq.gl

Maalaarut tulliuttunik imaqassaaq:

• Maalaarummut tunuliaqutaasoq
• Pappiaqqat attuumassutillit:

- Qinnuteqaat
- Suliffeqarfiup aamma Inuussutissarsiutinut immikkoortortap akornanni allaffigeqatigiinnerit
- Aalajangiineq

• Maalaarutit Inuussutissarsiutinut immikkoortortamit suliarineqassapput, suliarineralu ullut suliffiit 15-it tikillugit sivisussuseqarsinnaalluni.

Maalaarut suliarineqareerpat, suliffeqarfik Inuussutissarsiutinut immikkoortortamit mailikkut attavigineqassaaq.